Kinguaassiutitigut atornerluinerit Uummannap unitsinniarpai

Eqqumiitsuliortoq Gukki Nuka 14-inik ukioqarluni Uummannami arsarnermut sungiusaasuminit atornerlunneqarpoq.

Qanittukkut illoqarfimmut inuusuttuulluni qimassimasaminut siullermeerluni tikippoq. Tamanna Killiliisami maligassiuisutut sulinerani pivoq.

Tamatumunnga atatillugu saqqummersitani ’Tarnip qupineri’ takutippaa, taanna kingunerlutsitsinerminik suliaqarneranut ilaavoq.

Innuttaasunik ataatsimiititsinermi inuit 100-nit amerlanerusut peqataaffigisaanni, kinguaassiutitigut atornerlunneqarnermik misigisani Gukki Nukap oqaluttuarpoq, kiisalu minnerunngitsumik qanoq ingerlariaqqissimanerluni, inuunerlu toqqarsimallugu, naak arlaleriarluni kipiinnangajattarsimagaluarlugu.

Sulisut akornanni suliniuteqarnerup patajaallisarneqarnissaanut annertuumik piumassuseqartoqartoq malugaat, ilaatigut oqartussaasoqarfiit assigiinngitsunik suliallit akornanni suleqatigiinnermik ukkassinikkut najoqqutassanillu ersarissunik aamma suleriaasissat allattorneqarnerinik suliaqarnikkut, Isumaginninnarmut Aqutsisoqarfik tusagassiuutinut nalunaarummi allappoq.

Innuttaasunik ataatsimiititsineq

Uummannamiittoqareernerata kingorna innuttaasut innuttaasunut ataatsimiisitsissallutik aalajangersimapput, kinguaassiutitigut atornerluinerit qanoq akiorneqarsinnaaneri oqallisiginiarlugu.

- Innuttaasunut ataatsimiititsissaagut, tassani innuttaaqataasutut qanoq iliorluta kinguaassiuutitigut atornerluisarnerup unitsinneqarnissaanut iliuusissanik pilersaarusiornissaq, aamma qanoq innuttaasutut ataatsimoorluta kivitseqatigiilluta suleqatigiissinnaanersugut ataatsimiititsinerup siunertarissavaa, Sara Street, ilaqutariinnut sullissivimminngaanneersoq tusagassiuutinut nalunaarummi taama oqarpoq.

Illoqarfimmi tassanerpiaq atornerlugaaffigisamini maanna kinguaassiutitigut atornerluinernut akiuniartoqalernera, immikkuullarissumik isumaqartoq, Gukki Nukap isertuutinngilaa.

- Innuttaasut akisussaaffimmik tigusillutik kivitseqatigiinnissaat aallaqqaataaniilli takorluugaraara. Tamanna maanna pinialerpasippoq, aqqummilu alloriarnerujussuulluni, taanna Sermitsiaq.AG-mut oqarpoq.

- Neriuppunga amerlanerusut taamaaliorumaartut.

Isumaginninnermut Aqutsisoqarfimminngaanniit siunnersortit marluk angalasoqarnerani upalungaarsimasutut peqataasimapput, angalanerminni Gukki Nuka paaqqutaraat illoqarfimmilu suliamut attuumassutilinnik suliaqartunut ulluni marlunni sammisaqartitsisimallutik. Gukki Nukap aamma suliamut attuumassutillit oqaloqatigai.

Suliamut attuumassutillit qaninnerusumik suleqatigiinnissaat

Suliamut attuumassuteqartut maanna allannguinissamut piareersimallutik oqaatigaat.

- Peqqinnissaqarfik, politiit ilaqutariinnullu sullissivik ataatsimiinnermi saqqummiissapput nuannaarutigeqaarpullu suleqatigiissinnaagatta aammalu suliassaqarfiit assigiinngitsunik suliallit akornanni ilisimasanik avitseqatigiissinnaaleratta siunersiueqatigiissinnaallutalu, Sara Street oqarpoq.

- Gukki Nukap saqqummeereernerata kingorna innuttaasuniit politiinut ilaqutariinnullu sullissivimmut saaffiginnittut suliassanngortitsisullu arlaqarput qujamasuutigeqaarpullu innuttaasut naammatsimmata naak sakkortugaluartoq paquminartullu paquminarunnaarsimmatigit, taamaalilluta ikiuussinnaagatta tapersersuillutalu.

Tamatuma kingorna Gukki Nuka Isumaginninnermut Aqutsisoqarfimmi siunnersortit marluk peqatigalugit Kujataani angalaarpoq, tassani innuttaasunut aamma sulianut attuumassuteqartunut Qaqortumi, Nanortalimmi aamma Narsami angalaarput.

- Uummannami pisut assigalugit innuttaasut ammasumik eqqartuerusunneq iliuuseqarnissamillu piumassuseqarneq annertuvoq, tamannalu Qaqortumi innuttaasunut ataatsimiisitsinermi, innuttaasunit 100-rut sinnerlugu ilaaffigineqartumi malunnarsimaqaaq, Isumaginninnermut Aqutsisoqarfik taama allappoq.