Skip to main content

Kinguaassiutitigut atornerluinerit paaseqatigiinneq aqqutigalugu akiorneqassapput

Meeqqat inuusuttullu kinguaassiutitigut atornerlunneqartartut ikilisinniarlugit nunatsinni sulineq annertusarneqassaaq. Tamanna ingerlassaaq nunami tamarmi sulinerup assigiissarneratigut. Najoqqutassiaq nutaaq tassani iluaqutaassaaq.

- Meeqqat 2022-imi inunngortut taakkuussapput kinguaassiutitigut kannguttaatsuliorfigineqanngivissut siulliit, peqqissutsimut isumaginninnermullu naalakkersuisoq Martha Abelsen tusagassiortunik sisamanngornermi katersortitsigami taama oqarpoq.

Najoqqutassiaq nutaaq, ”Meeqqanik kinguaassiutitigut atornerluineq pillugu ilinniagalinnut najoqqutassiaq” maanna saqqummersinneqarpoq. Taanna atuarfinnut, meeqqeriveqarfinnut, sunngiffimmi sammisassaqarfinnut allanullu meeqqat ulluinnarni sumiiffigisinnaasaannut tamanut nassiunneqassaaq. Isumaginninnermut naalakkersuisoq Martha Abelsen ilisimatitsivoq najoqqutassiaq ilinniagaqarsimasunut, aammali kikkunnut tamanut, atuassallugu piukkunnartuusoq.

- Meeqqat kinguaassiutitigut atornerlunneqartarnerannut akiuiniarnerup nunap iluani tamarmi ataqatigiissumik ingerlannissaa pingaaruteqarpoq. Aammali susassaqartut akornanni suleqatigiinneq pisariaqarluni, Martha Abelsen oqarpoq.

Najoqqutassiaq

Pitsaaliuinermut Isumaginninnermullu Aqutsisoqarfik Killiliisap ataani suliaqarnermini najoqqutassiaq suliaraa. Najoqqutassiaq meeqqanik sullissisunut tamanut suliaavoq. Meeraq kinguaassiutitigut atornerlunneqarsimappat allatigulluunniit innarlerneqarsimasutut ersiuteqarpat, najoqqutassiami ersarissarneqarpoq qanoq iliortoqassanersoq, qanorlu iliorsinnaanermik oqaluttualianik imaqarluni.

Najoqqutassiap siunertaraa meeqqat inuusuttullu kinguaassiutitigut atornerlunneqarsimasut assigiimmik sullinneqarnissaat, aammalu kinguaassiutitigut atornerluineq eqqarsaatigalugu pinerliinerit pillugit assigiimmik paasinninnissaq, meeqqallu sullinneqarnissaanut periarfissanik ersarissaanissaq.

Pinerlineqartut piaartumik ikiorneqartassapput

- Pinerliisimasup pineqaatissinneqarnissaa utaqqinagu, kommunimut politiinulluunniit nalunaarutiginnittoqareerneranit ingerlaannartumik meeqqat qanoq issusaa qitiutinneqartassaaq. Meeraq ikiorneqassappat, pineqaatissiisoqarnissaq utaqqineqaqqaartassanngilaq.

Naalakkersuisup erseqqissaatigaa paasissutissiinikkut najoqqutarlu atorlugu ilisimasaqarnerulernerup kinguneranik meeqqat kinguaassiutitigut atornerlunneqarsimatillugit nalunaarutiginnittarnerit, taamatullu ikiuunnissat, amerlissasut.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER