Royal Greenland
Kinamiut Uummannamut apuupput
Kinamiut Uummannami Royal Greenlandip tunisassiorfiani suliartorlutik sapaatip akunnerata siuliani nunatsinnut tikittut Uummannami pisut pissutigalugit Qasigianngualiartinneqarallarnikut maanna Uummannamut apuussimalerput.
Kineserit taakku qulingiluat Royal Greenlandip sulisortaavi Uummannamut suliartoramik inuuniarneq sakkortunaarsimavaat.
Pinngortitami ajunaarnersuaq pissutigalugu taakku utaqqiisaasumik Qasigiannguanukartinneqarallarsimapput, tassanilu Uummannamut ingerlaqqinnissartik sapaatit-akunnerini marlunni utaqqisariaqarsimavaat.
Sisamanngornermi unnukkut apuuttut
Massakkulli illoqarfimmut apuuttut, Royal Greenland oqaluttuarpoq. Tamanna sisamanngornerup unnukkuani pivoq.
- Suleqatitaavut kinameersut qulingiluat maanna Uummannamut apuussimalerput. Qasigiannguaniit angallammik maanngaanneqarput ippassarlu unnukkut apuullutik, Uummannami Royal Greenlandip tunisassiorfiani tunisassiornermi ingerlatsisoq, Nick Johanson oqarpoq.
Sapaatiuppat ataasinngorpalluunniit sulilissasut
Suleqatit nutaat maanna Uumannamiinnerminni ineqarfissaminnut inissititereerlutik ulluni tulliuttuni pisortanut nalunaarsugassatitk isumagissavaat naatsorsuutigineqarporlu sapaatiuppat ataasinngorpalluunniit Royal Greenlandip tunisassiorfiani suliffittaaminni aallartissasut.
- Naatsorsuutigaarput suleqatitaavut sapaatiuppat ataasinngorpalluunniit tunisassiorfimmi sulilissasut, Nick Johanson oqarpoq, nangipporlu:
- Ilaatigut immaqa Uummannap sulluani tassaarsuaqartoqarnikuunera pissutigalugit piffissami kingullermi sulisut nikerartumik sulisarput. Suleqatitaavut sulillutik aallarteriarpata neriuutigaara tamikkiisumik tunisassiulissalluta, Nick Johansen oqarpoq.
Kinamiut Royal Greenlandimi suliartorlutik aasaq manna nunatsinnut tikittussat 36-it maanna tamarmik sumiiffinni assigiinngitsuni suliffissaminnut apuussimalerput, qulit Qasigiannguani, 17-it Maniitsumik kiisalu qulingiluat Uummannami.