Kinamiut suliartortut: Aalajaatsunik sulisoqarneq annertunerusumik tunisassiulersitsivoq
Royal Greenlandip Uummanami aalisakkerivia nunaqavissunik Kinamiunillu aalajaatsunik sulisoqalerneq pissutigalugu ataavartumik tunisassiulersimavoq aalisartullu utaqqinngikkaluarlutik tunisisinnaalersimallutik
Uummannami aalisartut Royal Greenlandip Uummannami tunitsivianut ulluni arlalinni tunissinissartik utaqqisinnaasarsimavaat. Ullunilu makkunani Royal Greelandip Uummannami tunitsivianut tunisinissamik isumaqatigiissuteqaqqaanngikkaluarlutik tunisisinnaalerput.
Tamanna Uummanni tunitsivimmi nunaqavissunik Kinamiunillu aalajaatsunik sulisoqalersimanermik peqquteqarpoq. Royal Greenland nittartakkamini taama allappoq.
Royal Greenland naapertorlugu Royal Greenlandip Uummannani tunisassiorfiani qalerallit nerpii nioqqutissatut naammasseriikkatut tunisassiarineqartartut annertunerulerput, tunitsivik siusinnerusukkut qaleralinnik niaquikkanik paperuikkanillu aamma qaleralinnik ilivitsunik pingaarnertut tunisassiortarsimavoq:
- Aalajaatsunik sulisoqarnerput pissutigalugu ataavartumik tunisassiorsinnaasimallutalu ataavartumik tunisassiornerput nangissinnaavarput, taamaattumik aalisartut 2017-imisulli tunisinissamut isumaqatigiissuteqarfigeqqaarata tunisiartorfigisinnaavaatigut. Taamatuttaaq aalajaatsunik sulisoqarnerput pissutigalugu qalerallit nerpiinik tunisassiornerulerpugut, tamannalu 2018-imi nangiinnarsinnaavarput, Royal Greenlandip Uummannami tunisassiorfiani ingerlatsisoq Kirsten Kristensen Worm, Uummannap tunisassiorfiani nunaqavissunik Kinamiunillu 14-inik aalajaatsunik sulisoqarluni qujamasuttoq, oqarpoq
Aamma atuaruk: RG: Nunaqavissunik sulisussarsisinnaannginnatta suliartortitsisarpugut
Qalerallit nerpiinik tunisassiornerulerneq
Royal Greenlandip Uummannami tunisassiorfiani sulisut massakkut 50-it missaanniipput, ulapaarfimmilu 85-iniit 100-usarput.
- Qaleralinnik niaquikkanik paperuikkanillu aamma tunisassiortarpugut, qaleralinnilli angisuunik qerisunik massakkut tunisassiorpiarneq ajorpugut. Qalerallit nerpiinik tunisassiornerulernissarput anguniagariuarsinnarparput, aamma aalajaatsunik ullullu tamaasa suliartortartunik sulisoqarnerput pissutigalugu angusinnaavarput. Tamanna usorsisimaarnaqaaq, tunisassiorfimmi ingerlatsisoq oqarpoq erseqqissaatigalugulu, Royal Greenlandip Uummannami tunisassiorfiata nunaqavissunik sulisoqarnissani pingaartimmagu nunanit allaneersunik sulisoqarnissani pitsaanerutinngikkaa.
Kinamiut 2017-imi juunip qaammataani Royal Greenlandip Uummannami tunisassiorfiani 2019-imi aasaanerata tungaanut sulisorissallugit tikisinneqarput.
Aamma atuaruk: SIK-mi siulittaasoq: Kinamiut aalisartut tikisissavagut?