Kinamiut Nuummi sinniisoqarfittaarnissaannik pilersaaruteqartoqanngilaq

Kinamiut nunatsinni sinniisuutitaqarnissaannik pillugu maannakkut pilersaaruteqartoqarneranik tikkuussisoqanngilaq. Kinami sakkutuunut ilinniarfiup sinniisui isumasioqatigiinnermi peqataammata tamanna paasinarsivoq.

Kinesisk flag

USA-p Nuummi sinniisoqarfimmik ammaaniarlutik qaammat kingulleq nalunaarutigaat.

Ilisimaneqartutuut Kalaallit Nunaat Kinami sinniisoqarfimmik ammaaniarluni pilersaaruteqarpoq.

Maannakkorpiarli Kinap Nuummi sinniisoqarfimmik ammaanissaanik pilersaaruteqartoqarneranik tikkuussisoqanngilaq. Sakkutuut naalagaata nuimasup akissutaa taama paasineqassaaq.

Københavnimi Illersornissamut Ilisimatusarfimmi Kina aamma Issittoq pillugit isumasioqatigiinnermut atatillugu tamanna apeqqutigineqarpoq. Kinami illersornissamut ilisimatusarfimmiit qallunaanut pulaarnerat isumasioqatigiinnermut peqqutaavoq.

Isumasioqatigiinnermi peqataasut aqutsisuat, generali Li Quan, Amerikamiusuulli ‘pissaaneq saamasoq’ atorneratigut Nuummi sinniisoqarfimmik ammaaniarnersut aperineqarpoq.

Toqqaannartumik akinngilaq, generali Li akissutini aallarnerpaa ‘pissaaneq saamasoq’ oqaatsitut atorneqaleqisutut taallugu.

- Kina Danmarkilu oqaluttuarisaanermik annertuumik peqarput. Tamanna nunanit oqaluttuarisaanikinnerniit annerusumik sunniuteqaqataangaatsiarpoq, Li Quan taama oqarpoq.

- Sunniivigeqatigiinneq inuit uummataanni nassaassaavoq, Li Quan taalliaarpalaartumik nangeqqippoq.

Generali Li Quan innersuussivoq Kinami H.C. Andersen asaneqarluarneqartuusoq kulturimullu tunngassutilimmik sunniuteqarneq taama ittoq nunat imminnut qanillattortittarnerarlugit. Saniatigut erseqqissaarpaa Kinap sukkulluunniit Danmarkip namminersortuunera ataqqisarigaa nunallu nammineq suliassaanut akulerunnissamik pilersaarani.

- Kinap nunat tamat akornanni inatsisit malittarivai, Li Quan oqarpoq.

Sinniisoqarfittaarnissamik periarfissaq Li Quanip akissutaani tassa taaneqanngilaq Kinallu sinniisoqarfittaarnissaminik pilersaaruteqarneranik tikkuussisoqarani.

Powered by Labrador CMS