Kinamiut angalatitsivii soqutiginnittut
Kinami suliffeqarfinnik nittarsaassisoqarnerani, Kalaallit Nunaanniit nittarsaassillutik angalasut, angalatitsiviit 130-t sinnillit naapippaat.
Namminersorlutik Oqartussat sinnerlugit angalasut, Inuussutissarsiornermut Nukissiuuteqarnermullu Naalakkersuisumit, Aqqalu Jerimiassenimit siulersorneqarlutik Kinami sapaatip akunnera 44-mi suliffeqarfinnik nittarsaassipput, tassani Visit Greenland, Kommune Qeqertalik, Destination Arctic Circle, Destination South Greenland, Air Greenland, Arctic Wonderland Tours, Greenland Cruises aamma Greenland Water Taxi takornariaqarneq pillugu nittarsaassisussatut qaaqqusaasimallutik.
Visit Greenland tusagassiutinut taama nalunaaruteqarpoq.
Kalaallit Nunaanni takornariat Kinameersut
Kinamiut Kalaallit Nunaanni takornariartut 2017-imi 1.400-t missaanniipput – 2015-imut sanilliullugit 28 %-imik amerlanerullutik. Taakku saniatigut kinamiut 600-t sinersorlutik 2017-imi aamma takornariarput. Kina tassaavoq Kalaallit Nunaanni takornariarnerpaat tallimaattut inissisimasoq, Danmark, Tyskland, USA Frankrigilu siulliullutik.
Suliffeqarfinnik nittarsaassinermi kalaallit Kinami Beijingimi angalatitsiviit 50-it naapippaat, taakku saniatigut illoqarfissuarmi Guangzhou angalatitsiviit 80-it takornarialerisunit aamma saqqummiiffigineqarlutik, taassumalu kingorna paasissutissanik, suleqatigisinnaasaminnilluunniit naapitsinissamut nioqqutinilluunniit amerlanernik neqeroorsinnaalernissaminnut periarfissinneqarlutik.
Tikitassaq nutaaq
- Kalaallit Nunaat tikitassatut nutaatut allanartutullu soqutigineqarluarpoq, malunnarporlu Kina Kalaallit Nunaannut soqutiginninneruleriartortoq. Kalaallit Nunaat tassaavoq misigisassarsiorluni takornarianit sungiussisimasunit suli tikinneqarsimanngitsoq, tamannalu immikkuullarittutut nalituvoq. Kinamiut pinngortitamik kultoorimillu allanartumik soqutigisaqartuupput, nunattalu pinngortitaata minguissusia kultoorittalu immikkuullarittuunera kinamiunit alutorineqarluarpoq, Mads Lumholt Visit Greenlandimit allappoq.
Takornariaqarneq pillugu ataatsimeersuarnermi, Towards More Tourismimi Nuummi sapaatip akunnerani matumani ingerlanneqartumi, kalaallit takornarialerisut 100-t sinneqartut peqataaffigisaanni, Asiap kujataata kangianit – pingaartumik Kinamit – takornariat amerlanerit tikittartut sammineqangaatsiarsimasut, taassuma erseqqissarpaa.
- Mittarfiit pillugit pilersaarutit paasinarsilluinnalernerani, Kinami takornariaqarneq pillugu nittarsaassinermi nunatsinnilu takornariaqarneq pillugu ataatsimeersuartoqarnerani malunnarpoq pisuni suliniuterpassuaqartoq, taakkulu tamarmik siunertarigaat Kalaallit Nunaanni takornariaqarnerup annertunerulernissaa, Mads Lumholt, Visit Greenlandimi siunnersorti, ilanngullugu nalunaaruteqarpoq.