Kinami suliffeqarfinnik nittarsaanermi saqqummiussarpassuit
Nunatta ernga, atisat, takornariaqarneq, uulia nukissiuutillu minguitsut Kinami suliffeqarfinnik nittarsaaniarluni sapaatip akunneranik sivisussuseqartumik angalanermini, Inuussutissarsiornermut Nukissiuuteqarnermullu Naalakkersuisup, Aqqalu Jerimiassenip ilaatigut nittarsaappai
Aqqalu Jerimiassen, Kinap illoqarfiata pingaarnersaani Beijingimi nunatta suliffeqarfiutaanik nittarsaassinermini, nunatsinneersunit 30-nit nittarsaasseqataasunik ilalersorneqarpoq.
Danskit Beijingimi aallartitaqarfiani Kalaallit Nunaata ulluanik taallugu piareersaasoqarpoq saqqummiussisoqarlunilu, tassani oqartussat, suliniaqatigiiffiit naalagaaffiullu suliffeqarfiutai saqqummiisunut takusaatinneqarlutik. Saqqummiinermi suliffeqarfiit neqerooruteqarput, ilaatigullu nunatsinnit atisaliortut assigiinngitsut pingasut, kinamiunik atisanik takutitsisoqarlutik atisaliaminnik saqqummiipput.
Kina ineriartorluartoq
- Kina ukiuni makkunani ineriartorluarpoq, taamaammat kinamiut kitaaniit pisiortornissaminnut aammalu nunarsuup kitaanut tikillutik takornariarnissaminnut periarfissagissaarnerulernikkuupput. Taamaammat nuannaarutigaara kalaallit takornarianik sullissisut atisaliortullu peqataasinnaammata, Aqqalu Jerimiassen tusagassiutinut nalunaarummini oqarpoq.
Nunatsinni imermik maqitsiviusinnaasut sumiiffiit pingasut qaammammi matumani taassuma saqqummiutissavai, nunattami ernga nunarsuarmi nioqqutissatut minguissuseqarmat, avammut nioqqutaalersinnaanera periarfissaavoq.
Killormoortumik periuseqarneq
- Imeq pillugu pilersaarummi periutsit killormoortilernikuuagut – Namminersorlutik Oqartussat GEUS suleqatigalugu maanna sumiissusersineq misissuinerlu suliarissavai, taamaaliornikkut nunatsinni nunarsuullu sinnerani avammut nioqquteqalernissaq tunngavilerneqarsinnaalissalluni. Inuussutissarsiornermi periarfissagissaartitsinerulerneq erngup nioqqutigineqalerneranik kinguneqarumaartoq qularinngilara, Inuussutissarsiornermut Nukissiuuteqarnermullu Naalakkersuisoq oqarpoq, taassuma uuliasiorfiit aamma ataatsimeeqatigai.