Kinami nutaamik sinniisoqarfeqalissasoq
Naalakkersuisut martsip qulingani ataatsimiinnerminni aalajangerput, Kinami siinniisoqarfimmik ammaasoqarnissaanik Inatsisartunut innersuussisoqassasoq
Polikkerit Inatsiartut upernaaru ataatsimiinneranni aalajangiiffigissavaat, Kalaallit Nunaat nutaamik sinniisoqarfittaassanersoq. Kalaallit Nunaat Bruxellesimi, Washingtonimi Reykjavikkimilu sinniisoqarfeqareerpoq.
Kinami sinniisoqarfeqalerniarnermi siunertaavoq, niuernikkut, politikkikkut kulturikkullu atassuteqaatinik siuarsaanissaq, tassa Kinamiinnaanngitsoq, aammali nunani Kinap eqqaaniittuni avammut niueruteqarnermi tunisaqarfiusartuni, soorlu: Japanimi Koreamilu Kujallermi.
Nuna tunisaqarfiunerpaasartoq
Kina nunaavoq Kalaallit Nunaata avammut niueruteqarnermini tunisiffiginerpaasartagaa, taamalu nutaamik sinniisoqarfeqarfigilissallugu naapertuunnerpaalluni.
- Sinniisoqarfiup ulluinnarni suliaqartarnermi saniatigut, asiamiut Kalaallit Nunaanni aningaasaliissuteqarsinnaasut saqqummilaartillugillu nittarsaattassavai. Sinniisoqarfiup aamma Kinami oqartussanik suliaqartartunillu Kalaallit Nunaata ullut tamaasa toqqaannartumik oqaloqateqartarnissaa isumagisassavaa, 2019-imut nunanut allanut tunngasutigut ingerlatsinikkut nassuiaammi tamanna atuarneqarsinnaavoq.
Sinniisoqarfissaq Kinap suatungaanissanersoq pillugu Sermtsiaq.AG-p paasisaqarusunnini iluatsinngitsoorsimavaa.