Kinami Canadap aallartitaata nunaqqatiminik alakkaasinnaatitaasoq

Canadamiut marluk Kinami tigusaasimasut, canadamiut aallartitaata akuerisaanermigut alakkarpai.

Kinami Canadap aallartitaa, canadamiut suliffeqarfinnik aallarnisaasoq niuertorlu sapaatiummat naapinnissaanut akuerisaavoq, taanna Kinami ullut arfinillit matuma siorna tigummigallarneqalerpoq.

Canadap nunanut allanut ministeriaqarfia taama ilisimatitsivoq.

Suliffeqarfimmik aallarnisaasoq Michal Spavor decembarip qulingani tigusarineqarpoq, kinamilu oqartussanit Canadamiuusunit tigusarineqartuni tulliulluni.

Taanna sioqqullugu diplomatiusimasoq Michael Kovrig tigusarineqarpoq.

Canadamiut Beijingimi aallartitaat, John McCallum, Kovrigimik naapitsinissaa akuerineqareersimavoq, tallimanngormallu naapissimallugu.

Canadamiut marluk tigusarineqarput Kinap Canadallu akornanni ataqatigiinniarnerup tatisimaneqarnerani.

Taamaattoqarneranut pissutaavoq kinami attaveqarnermut tunngasunik suliffeqarfissuup Huaweip aningaasaqarnermut pisortaa, Meng Wanzhou, Canadap illoqarfiani Vancouverip mittarfissuani decembarip aallaqqaataani tigusarineqarmat.

Tigusarinninneq USA-p piumasaqarneranit pivoq, Meng Wanzhoulu maanna eqqartuussinissaq siunertaralugu USA-liaanneqassasoq piumasarineqarsimalerpoq.

Aningaasaqarnermut pisortap Canadamit iperagaapallassanngippat tamanna kinguneqarnerlussinnaasoq Kina aarlerisaarereerpoq.

Vancouverimi eqqartuussisup sapaatip akunnerani kingullermi aalajangerpaa Meng Wanzhuo akiliussisoqareerneratigut iperarneqassasoq, Canadamili oqartussaasut USA-mut tunniussinissamik suliaqarlutik naammassitinnagit Canada qimassanngikkaa aalajangerlugu.

Kinami tigusarinninnerit Meng Wanzhoumut attuumassuteqarnersut suli uppernarsarneqanngillat.

Meng Wanzhou aningaasaqarnermut pisortaaginnanngilaq, aammali Huaweip, nunarsuarmi attaveqaqatigiinnermut atortunik sanaartortut annersaata, smartphonesinillu nioqquteqarnerpaat tulliata, tunngaviliisuata panigaa.

Canadamiunik marlunnik tigusarinninneq, “Kinap nunatut sillimaniarneranut ulorianaateqartunik suliaqartutut” pasinninnermit tunngaveqartoq, Kina oqariartuuteqareerpoq.

Michael Spavor niuertuuvoq, Nordkoreamullu attaveqarluni.

Tigusarineqartup aappaata, Michael Kovrigip, Canadami premierministeri Trudeaus Kinamut tikeraarnerani ikiorsimavaa.

Powered by Labrador CMS