Kinaassuseq pillugu qitinnermik filmiliaq

- Qitittunik isiginnaarluni alutornarluinnartuuvoq. Sammisaq kinaassuseq tamanut tunngasuuvoq. Kalaallit Nunaanni qitittartorpassuaqarpoq piginnaanilinnik, sungiusarsimanngitsunilli. Anguniagarlu tassaavoq imminut tulluusimaarutiginissaq pillugu isumassarsinartumik alutornartumillu filmiliornissaq. Sumiuuneq kinaanerlu apeqqutaatinnagit.

Maida Hals, qitinnermik filmiliami piviusulersaarutaasumi Dancing with Icemi, Qiajuk Productionsip Norgemiut filmiliortitseqatigiiffiat Hals Productions suleqatigalugu tunuliaqutaaffigisaani, ilitsersuisuusussaq, taama oqaluttuarpoq.

Piviusulersaarummik filmiliaq, kinaassuseq pillugu eqqarsaatinik nunarsuarmilu qeqertat avannarlersaanni asseqanngitsuunermik sammisaqarfiusoq, pineqarpoq.

- Filmip tapiiffigineqarnissaanut ilimasaarneqaqqinneqarput nuannaarutigisorujussuuarput. Tamatuma kinguneranik Norgep Kalaallit Nunaatalu akornanni suleqatigiiffigineqartumik tamakkiisumik aningaasaliiffigineqartumik suliarineqartussanngorpoq, Ruth Montgomery-Andersen Qiajuk Productionsimeersoq oqarpoq.

Piviusulersaarummik filmiliaq Nuummi oktobarimi immiunneqartussaq Norges Kulturrådimit, Namminersorlutik Oqartussat filmiliornermut aningaasaateqarfianit aamma nunani avannarlerni piorsarsimassutsikkut attaveqaammit NAPA-mit aningaasaliiffigineqarnissamik ilimasaarneqarpoq.

Maida Hals nipilersukkanik, videonik piviusulersaarutinillu filmilianik suliaqartarnini pillugu ilisimaneqarpoq. Filmiliai Norgemi, Tuluit Nunaanni Mexicomilu arlalinnik nersornaaserneqarsimapput.

Ruth Montgomery-Andersen suliarinnittuuvoq filminilu arlalinni suliarinnittooqataasimalluni. Filmiliaa Naapinneq USA-mi Norgemilu nersornaaserneqarsimavoq.