Kina peqataanngippat Killavaat Alannguanni aatsitassarsiorfeqalersinnaanngilaq
Kinami ingerlatseqatigiiffiit teknologiimi saffiugassanillu qaqutigoortunik niuerfimmi pingaarutilerujussuarmik inissisimaffeqarput. Tanbreez nunarsuarmi saffiugassanik qaqutigoortunik peqarfiit annerpaartaata tulliattut isumaqarfigisaminnut aningaasaliisussarsiorpoq. Greg Barnesip aatsitassarsiorfiliornerup ukiut marluk qaangiuppata aallartinnissaa neriuutigaa.
Saffiugassat qaqutigoortut Kinalu ataqatigiipput. Kalaallit Nunaat Killavaat Alannguanni aatsitassiorfeqalernissaanut angerpat, Kinap mappiunneqarnissaanut aamma angertoqassaaq.
Ajornakusoortorujussuuvoq. Aap, Killavaat Alannguanni aatsitassarsiorfimmik aallartittoqassappat Kinap avaqqunnissaa pissusiviusuni ajornarluinnarpoq.
Aviisi Sermitsiaq taama allappoq.
Kinamimi ingerlatseqatigiiffiit saffiugassanut qaqutigoortunut, biilinut innaallagiatortunut, qarasaasianut, oqarasuaatinut, anorisaatinut pingaaruteqaqisunut, tunngasut tamarluinnaasa – aningaasaqarneq, teknologii, niuerfik - aqutaraat.
Taama pineqartoq pillugu Danmarkimi immikkut ilisimasallit siuttuusut ilaat, siunnersortit pisortaat Per Kalvig, GEUS, (Danmarkimut Kalaallit Nunaannullu Ujarassiooqarnikkut Misissuisoqarfik) oqaluttuarpoq.
- Kina nalilinnik uiguleriiaat niuerfiullu aqqutaa tamakkerlugu aqunnissaannik periusissiaqarpoq. Tamanna politikkikkut tapersersorneqarpoq, tamatumanilu Kina nunanit killernit allaanerusunik periuseqarpoq. Kina unammillerneqaleruni akinik qaffaarujussuarsinnaavoq. Taamaaliornimigullu kisermaassinermik tamakkiisuupajaartumik angusaqarluni. EU-Kommissioni Europap isumalluuteqarpallaarunnaarnissaanik anguniagaqarluni tamaviaarluni suliaqarpoq. USA aamma taamaaliorpoq. Kisianni tamanna pissusiviusunut sanilliullugu pappiarani ajornannginneruvoq.
- Saffiugassaink qaqutigoortunik suliaqassagaanni Kinap avaqqunnissaa maannakkorpiaq unammilligassaangaatsiarpoq, Per Kalvig oqarpoq.
Taamaakkaluartoq Australiamiut ingerlatseqatigiiffiat Tanbreez Killavaat Alannguanni taamaaliorniarsarivoq.
Aviisimi AG-mi allaaserineqartoq atuarneqarsinnaavoq. Aviisi uani pissarsiariuk: