naalakkersuisuni ajornartorsiorneq

Kina Naalakkersuisunngussava?

Naalakkersuisuni ilaasortassamik toqqaaniarnermi Atassut Siumullu avammut tusarliussinaversaarallarput

Naalakkersuisuni ilaasortanngortussaq marlunngornermi Inatsisartuni ivertinneqassaaq

Naalakkersuisuni ilaasortassamik nutaamik marlunngornermi ivertitsisoqassaaq Miiti Lyngep Partii Inunneersup paarlatsissaanik. Sulili nalunarpoq Miiti Lyngep kina paarlatsigissaneraa partiimillu sorlermeersuunissaa suli nalunarluni.

Partii Inuit Naalakkersuisunit oktoberip 23-at soraarsitaapput – uranimut naaggaarluinnarnerup atorunnaarnissaanu aqaguttoq. Naalakkersuisooqataagaluartut taakku naalakkersuisuni inigisartik pilliutigaat uranimut naaggaarluinnarnerup maanna atorunnaarnissaa taperserumannginnamikku.

Inatsiartuni sinniisoq

Naalakkersuisut siulittaasuata Aleqa Hammondip Siumumeersup Miiti Lyngep akisussaaffigisaralui Ineqarnermut, Pinngortitamut Avatangiisinullu Naalakkersuisoqarfimmut tunngasut akisussaaffigigallarpai. Maannalu tassa Miiti Lyngep paarlartissaa marlunngornermi toqqarneqartussanngorpoq. Siumup aamma Atassutip toqqaanissaq avammut nipaarsaarukkallarpaat.

- Naalakkersuisut siulittaasuata Aleqa Hamondip Siumumeersup kina naalakkersuisunngussanersoq marlunngornermi nalunaarutigiumaarpaa, Atassutip siulittaasua Gerhardt Petersen naatsumik taama Sermitsiaq.AG-mut oqarpoq.

Atassutip sapaatip akunnera kingulleq Sermitsiaq.AG-mut oqaatigaa naalakkersuisuni ilaasortassap Atassummeersuunissaa piumarigitsik.

Inatsisartut allattoqarfiata aamma nalunaarutigisinnaanngilaa Naalakkersuisuni ilaasortassamik toqqaanissamut atatillugu kina Inatsisartut sinniisussatut aggersarneqassanersoq.

- Tamanna aatsaat nalunaarutigineqarsinnaavoq Naalakkersuisuni ilaasortassap aqqa pisortatigoortumik nalunaarutigineqareerpat, Inatsisartut allattoqarfiat Sermitsiaq.AG-mut ilisimatitsivoq.

Powered by Labrador CMS