Arctic Circle
Kina ersersaavoq: Kalaallit Nunaanni ilisimatusarfimmik sanaartorusutoq
Kina Kalaallit Nunaanni ataavartumik ilisimatusarfimmik ammaanissamik kissaateqarpoq. Tunup avannaani imaluunniit Nuup eqqaani. Tamanna pisortaanerup tulliata Yong Yu'p Reykjavik'imi Arctic Circlemi ataatsimeersuarnermut atatillugu ersersarpaa.
Ilisimatusarfik pilersaarutit malillugit 2000 kvadratmeterinik missaanni annertussuseqartoq illutassaanut unnuisarfissanut misissuisarfinnullu aggulunneqassallutik. Ilisimatusarfimmi ilisimatusartut 15-20 akornanni najorneqarsinnaassaaq ukiorlu kaajallallugu ammatinneqassalluni.
Ersersaaneq
Kinamiut pilersaarutaat Reykjavik'imi ataatsimeersuarnermi tallimanngormat aallartittumi, Polar Research Institute of China (PRIC) pisortaanerup tulliata Yong Yu'p aatsaat tamanut saqqummiuppai. Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmiit, folketingimi ilaasortaq Aaja Chemnitz Larsen aamma Kommuneqarfik Sermersuumi borgmester Asii Chemnitz Narup aamma peqataapput.
PRIC'mi pisortaanerup tulliata, Yong Yu'p, Sermitsiaq.AG'mut nassuiaatigaa 'sukkanerpaaq atorlugu ilisimatusarfik pilersikkusupparput'.
Ilanngullugulu naqissuserpaa, anguniagassatut pilersaaruteqartoqanngitsoq.
Siallernerulernissaa ernumassutigineqartoq
Taanna nassuiaavoq, Issittumi silap pissusaata allanngoriartornerata malitsigisaanik Kina'mi siallernerulernissaa Kina'p assut ernummatigigaa. Taassuma saniatigut Issittsumi angallatit aqqutaat nutaat, uulia, gas aatsitassallu Kina'mit soqutigineqarput; taakkua tamarmik Kina'p Issittumi ilisimartusarnermik pisariaqartitsineranik annertusaataapput.
Kalaallit Nunaanni ilisimartusarfimmi pilersaarutit malillugit, imaani, nunami, silaannarmilu silap pissusaanik ilisimatusarnermut atorneqassaaq, taakkulu ataanni uumasunik, naasunik sikullu ingerlaartarnerinik ilisimatusarnermut.
Akerleriiffiusinnaasoq
Piffissami sivitsortumi ilisimartusarfimmik pilersitsinissaq pillugu Kina Naalakkersuisunut Ilisimatusarfimmullu isumaqatiginninniarsimavoq.
Pilersaarutit akerleriiffiusinnaapput, minnerunngitsumik kinamiut Kalaallit Nunaanniilernerulernissaat qallunaat naalakkersuisuinit ernumassutigineqarmat.
Kangilinnguit
Kingullermik qallunaat naalakkersuisuisa 2016-imi sakkutooqarfiusimasoq Kangilinnguit kinamiut suliffeqarfiutaannut tunerusussimanngilaat. Taamaattoq ilisimatusarnermut ilinniartitaanermullu oqartussaaffik qangali tiguneqarsimavoq, taamaammaat ilisimatusarfimmik isumaqatiginninniarnerit Naalakkersuisut kinamiullu oqartussaasuinit ingerlanneqarput.