Kim: Siumut partii nukittuujuvoq
Siumup 2018-imi nukittussutsini uppernarsaqqippaa. Kim Kielsen ukiortaassamut AG-mi apersorneqarnermini taama oqarpoq.
Politikkikkut ukioq tamalaanik aqqusaagaqarfiugaluartoq, Siumut suli Nunatsinni siuttuuvoq.
Partiip innuttaasut akornanni inissisimalluarneranik takussutissaavoq, Kim Kielsen AG-mit apersorneqarnermini oqarpoq.
- Siumumut ukioq 2018 pissanganartarsimavoq, aamma partiitut angusat imaannaanngillat, soorlu qinersineq Siumumut kinguariarfiugaluartoq Siumut Nunatsinni partiini annersaaginnarpoq, tamatuma takutippaa Siumut Inuiaqatigiinni ajunngitsumik inissisimasoq. Ukioq 2018 Siumut marloriarluni Naalakkersuisunik pilersitsisarpoq tassa 15. maj nutaanik Naalakkersuisunngortitsigami aammalu Naleraq pissimmat 3. oktober Naalakkersuisunik ikinnerussuteqartunik pilersitsilluni Demokraatit tapersersortuliullugit. Partiit nakuusut taamaaliorsinnaasarput. Siumumut uggornarpoq angallannikkut aaqqissuusseqqinnermut atatillugu mittarfissuit sanaartulernissaat ukioq manna aallartinngitsoormat. Soorunami suliat ingerlanneranni Naalakkersuinikkut pissutsit matumani apeqqutaalluinnarput, soorlu upernaaq manna qinersisariaqalersimaneq. Siumumut aamma uggornarpoq aalisarnermut inatsisitigut aaqqissuusseqqinnissap kinguaattoornera, kisianni ataatsimut isigalugu kinguaattoorneq ajunngitsumik inerneqartissallugu suleqataassaagut.
AG-p partiimi siuttut tamaasa ukioq qaangiutilersoq kingumut qiviarfiginissaanut siunissarlu pillugu apeqquteqarfigisimavai. Apersuinerit tamakkiisut aviisimi atuarsinnaavatit: