Kimmip uranimut akerliusut naapikkai
Naalakkersuisut siulittaasuata, Kim Kielsenip (S) Narsamiinnermini Uraani Naamik-mi siulersuisuunerit ippassaq naapippai. Nutaartaqanngilaq, Uraani Naamimmi siulittaasoq naliliivoq.
Mariane Paviassen ataasinngornermi nalunaaqutaq 9:44 sianerfigineqarpoq. Naalakkersuisut siulittaasuata allattaata ilisimatippaa, Kim Kielsenip Uraani Naamik ullup ingerlanerani naapikkusukkai.
- Oqarpunga nalunaaqutaq 14.30 naapissinnaanngitsugut sulisussaagatta. Taava isumaqatigiissutigaarput nalunaaqutaq 16.15. Kingusinnerusukkut ilisimatinneqarpunga kommunep ataatsimiittarfiani naapissasugut, Mariane Paviassen, Uraani Naamimmi siulittaasuusoq oqarpoq.
Piffissaq sivikitsuinnaq atorlugu naapinnissaq isumaqatigiissutigineqaraluartoq, taamaattoq Kuannersuit pillugit apeqqutit arlallit Naalakkersuisut siulittaasuannut apuunneqartussat piareersarneqarput.
Paasisat nutaartaqanngillat
- Ataatsimiinnertut taasinnaanngilara. Ataatsimiittoqassatillugu piffissaatillugu pilersaarusiorneqartarpoq, oqaluuserisassallu piareerneqartarlutik. Ippassaq tamanna pinngilaq, Mariane Paviassen nassuiaavoq.
Ataatsimiinneruppat imaluunniit kaffesoqatigiilluni naapinneruppat, inernera naammagineqanngilaq. Naapinnermi ineqarnermut attaveqatigiinnermullu naalakkersuisoq, Karl Frederik Danielsen aamma peqataavoq.
Apeqqutit soorlu VVM-imut nalunaarusiaq qanoq ingerlanersoq, sunik imaqarnersoq, paasititsiniaanerni pitsaasuinnaat sooq sammineqartarnersut, Kuannersuarmilu aatsitassarsiortoqaratarnissaanut misissueqqaarnermi innuttaasut peqataatinneqassanersut Uraani Naamik-mit apuunneqarput.
Naapinnissap tungaanut innuttaasut arlallit naapiffissap eqqaani katersuussimapput, naammaginnikkunnaarsimanertik takutinniarlugu.
- Neriuppunga tamanna takutitsisoq erloqinitsinnik. Pissutsit naammaginngilagut, Mariane Paviassen nassuiaavoq.
Ernummatigineqartoq
Uraani Naamik Narsami suliniaqatigiinnit pilersinneqarpoq. Eqimattap kissaatiginngilaa Kuannersuarni uranimik piiaasoqarnissaa. Aatsitassarsioqatigiiffiup GME-p aatsitassat qaqutigoortut sumiiffimmi piiassallugit pilersaaruteqarfigaa. Piiaanermi uran saniatigut piiarneqartariaqassaaq, qaqqaq annertuumik uraneqarmat.
- Naapinnerput naammassimmat Naalakkersuisut siulittaasuat oqarfigaara oqaloqatigiinnitsinnit eqqissiallannanga, Kuannersuarnilu aatsitassarsiortoqarnissaa pillugu suli toqqissisimananga. Tamanna aamma paasivaa, Uraani Naamik-mi siulittaasoq oqarpoq.
Taassuma nassuiaatigaa Naalakkersuisut VVM-imut nalunaarusiamik utaqqinerminni oqaaseqareersinnaannginnerminnik akissuteqartarneq naapinnermi oqaatigineqaqqittoq.
- Tamanna naammagisinnaanngilluinnarparput, akikippallaarpoq taama oqassalluni, oqarpoq.
- Illoqarfitta inerisarnissaa kissaatigaarput. Akissutisisarpugulli Kuannersuarni misissuineq utaqqineqaqqaartoq. Utaqqerusunngilagut, nammineerluta illoqarfipput inerisarusupparput.
VVM-imut nalunaarusiaq piffissami sivitsortumi suliarineqarpoq. Nalunaarusiaq saqqummingajalersoq martsimi ilisimatitsissutigineqaraluarpoq, sulili saqqummernani.
Siulittaasorli isumalluaateqarpoq. Neriorsorneqarpoq aatsitassanut naalakkersuisunngorlaaq Narsamut piaarnerpaamik tikeraassasoq.
- Paasinarsissaaq Naalakkersuisut siulittaasuannit ersarinnerusumik taanna akissuteqarsinnaajumaarnersoq, Mariane Paviassen, Uraani Naamik, naggasiivoq.