Kimip Vittu isumaqatiginngilaa

Nunanut allanut naalakkersuisup Vittus Qujaukitsup (S) oqariartuutai arlallit nammineq isummersuutigigai naalakkersuisunut siulittaasup Kim Kielsenip (S) erseqqissaassutigai.

Politikenimut Arctic Circlemilu ataatsimiinnermi qariartuutigineqartut Quibecimi tassani pineqarput.

- Matumuuna erseqqissaatigissavara allaaserisani taakkunani isummat saqqummiunneqartut ilaat Naalakkersuisuni oqaluuserineqarnikuunngimmata Kim Kielsen (S) nalunaarummi allappoq.

Atuaruk: Vittusip Danmark USA-lu sioorasaarpai

Inatsit tunngaviusoq atuuppoq
Isummersuutit saqqummiunneqartullu oqaluuserinissaat Naalakkersuisut periarfissaqarfiginngikkallaraat nassuiaatigaa. Oqariaartuutigineqartullu imarisaat oqaaseqarfigissanngikkallarnerarpai Naalakkersuisulli danskit naalakkersuisuinik suleqateqarnerminni periaasissamissut najoqqutarisaannut tunngasumik saqqummiussilluni.

- Tunngaviusumik inatsit nunatsinni qanoq toqqammavissaqartiginersoq nunatsinnilu atorfissaqassusaata apeqqusersorneqarsinnaanera Naalakkersuisuni oqaluuserineqarsimananilu arlaatigut aalajangiiffigineqarnikuunngilaq, Kim Kielsen (S) oqarpoq.

Naalagaaffeqatigiinnermilu avissaarnissamik sioorasaarineq piviusunngorunnanngitsoq aamma oqaatigaa.

- Naalakkersuisuni oqaluuserineqarnikuunanilu aalajangiunneqarnikuunngilaq danskit naalakkersuisuinik isumaqatigiinngissuteqarnermut illuatungiliissutissatut Naalagaaffeqatigiinnermit avissaarnissamik oqariartuuteqartoqarsinnaasoq. Aamma taamatut siunertalimmik eqqartuisoqalernissaa naatsorsuutiginngilara, allappoq.

Atuaruk: Vittus pillugu Løkke ernumassuteqanngitsoq

USA-mut sioorasaarisoqanngilaq

USA Pituffimmit anisinnissaanut sioorasaarineq kalaallit politikkerinngikkaat aamma oqaatigaa.

- Amerikamiut nunatsinniinnerisa atorunnaarsinneqarsinnaanerat Naalakkersuisuni oqaluuserineqarsimananilu aalajangiiffigineqarnikuunngilaq.

Amerikarmiut Kalaallit Nunaaniinnerannut annertunerusumik pissarsiaqaatigalugulu iluaqutigisinnaaneranut isumaqatiginninniarnermi siunertarineqartut Inatsisartunit aalajangiunneqarnikunut innersuussivoq.

Atuaruk: Namminiilivinneq ima aningaasalersorneqassaaq

Suleqatigiinneq illersorpaa

Nunat akornini iluamik oqallittoqassasoq aamma isumaqarpoq.

- illuatungeriit tamarmik iluaqutigisinnaasaat nunattalu ineriartorneranut iluaqutaasussaq anguniarlugu Naalakkersuisut danskillu naalakkersuisuisa suleqatigeeriasiat innarlernaveersaarlugu pitsaasumik inerisarniartariaqaripput isumaqarpunga.

Atuaruk: Vittus uummaarissumik oqallitsitsisoq

Danmarkili ministerilluunniit suliani ataasiakkaani isornartorsiorneqarsinnaasartut isumaqatigineqaratillu aamma erseqqissarpaa.

- Kisianni taamaattoqartaraluarpalluunniit aalajangiusimasariaqarparput naligiimmik ataqqeqatigiissumillu suleqatigiittoqarnissaa ujartugariuaannaripput, taavalu aamma ministerit Naalakkersuisullu akornanni ataatsimeeqatigiinnerini aaqqiagiinngissutaasinnaasut aaqqiissuteqarfiginiarneqartassasut. Tassami suleqatigiissutissagut susassaqarfiit soqutigisaqarfiillu taama amerlatigitillugit aaqqiagiinngissuteqartoqartarnissaa tamatigut pinngitsoorneqarsinnaasarnavianngilaq.