Kimip tusatsiakkat ilumuunnginnerarpai: Siumumi siulittaasutut ingerlaannassaanga
Folketingimut qinersineq qaangiuppat Kim Kielsenip siulittaasutut tunuarnissaanik pilersaaruteqarneranik oqalunneq ilumuunngilaq, taanna naqissusiivoq.
Kim Kielsenip Siumumi tunuarnissamut pilersaaruteqarneranik oqallinnerit ingasattajaarnerupput, taanna nammineq oqarpoq.
- Tamanna ilumuunngilluinnarpoq. Aappaagu ileqquusumik ataatsimeersuarnissatta tungaanut siulittaasutut ingerlaannarniarpunga, Kim Kielsen Sermitsiaq.AG-mut taama oqarpoq.
Tusatsiakkat qineqqusaarnerup ingerlaneranni siammarterneqarsimapput.
- Kujataani Folketingimut qineqqusaarnermut atatillugu Naleqqamiit qineqqusaartut inunnut qapputigisimavaat Siumunngooq siulittaasua Folketingimut qinersititsineq naammassippat siumup siulittaasuatut tunuarniartoq, Siumumi siulittaasup tullia, Karl-Kristian Kruse tusagassiuutinut nalunaarummi taama allappoq.
Kim Kielsenip maanna qinigaaffimmi 2020-ip tungaanut ingerlasumi tunuarnissamik pilersaaruteqanngitsoq, taassuma naqissuserpaa.
- Qineqqusaarnerup ingerlanerani taamatut paasissutissanik eqqunngitsunik qineqqusaarneq atorneqarnera inissaminiinngilaq, Siumumi allatsi Mikael Petersen oqarpoq.
- Siumumiit kaammattuutigissavarput, Folketingimut qineqqusaaarnerit torersumik inunnillu ataqqinnittumik ingerlanneqarnissaat tamanit sulissutigineqaqqullugu, Karl-Kristian Kruse oqarpoq.