Kimip naalakkersuisoqatigiivi tallimat
Atassutip ippassaq tunuarnerannit Kim Kielsen maanna Naalakkersuisunut siulittaasuunermini naalakkersuisoqatigiit tallimassaannut siuttuuvoq
Ippassaq pisut ilungersunaraluartut Kim Kielsen (S) suli amerlanerussuteqartunik tunuliaquteqarpoq, partii tapertaasoq Demokraatit tunuliaqutaatillugit.
Tassami Siumut Inatsisartuni 10-nikilaasortaatitaqarpoq, Demokraatit arfinillit aamma Nunatta Qitornai ataatsimik, taakkulu 31-iusunut 17-iupput.
Kim Kielsenip Siumullu amerlanerussutilinnik katersuutitsillutik tunuliaquteqarnissartik iluatseqattaarnikuuaat, aamma pisuni ilungersunartuni. Illuanik naalakkersuisoqatigiit ataatsimoortinnissaat annertuumik ajornakusoortippaat.
Kim Kielsen 2014-ip naanerani Naalakkersusiusunut siulittaasunngorami, maanna naalakkersuisoqatigiinnut tallimanut siuttooreerpoq. 2014-imi qinersinermi Siumup partiini annersaatinnissaa qulakkeerpaa, naak tunngavigineqartoq ajornakusoorpasikkaluartoq. Tamatumalu naalakkersuisoqatigiinnik pilersitsinissamut periarfissippaa, tassanilu Demokraatit aamma Atassut peqataatippai.
Naalakkersuisoqatigiit namminiilivinniarnermik anguniagallit
Ukiut marluk qaangiuttut 2016-imi Kim Kielsenip partiit talerperliit Inuit Ataqatiinnik aamma Partii Naleqqamik taarserpai. Naalakkersuisoqatigiinermut isumaqatigiissummi namminiilivinnissaq siullertut allassimavoq.
Kisianni 2017/2018-imi ukiukkut suleqatigiinneq ajortippoq. Aalisarnermut inatsimmut siunnersuut ilaatigut ajornartorsiortitsivoq. Marsip tallimaanni 2018-imi Kim Kielsen Inatsisartunut qinersisoqarnissaanik nalunaaruteqarpoq.
Apriilip 24-anni taasisoqarnerani Siumut annaasaqaraluarluni Inuit Ataqatigiinnit anneruinnarpoq.
Ikinnersussuteqarlutik Naalakkersuisut
Tassani Partii Naleraq, Atassut aamma Nunatta Qitornai, tassani naalakkersuisoqatigiinni amerlanerussuteqarput. Kisianni Partii Naleqqap aamma Siumup akornanni mittarfiliortiternissaq pillugu annertuumik akerleriittoqartoq erngertumik paasinarsivoq. Danskit mittarfinnut suleqataanissaat pillugu Kim Kielsen aamma Lars Løkke Rasmussen isumaqatigiissuteqarmata ajalusoortoqarpoq, Partii Naleraq qaammatit pingasuinnaat qaangiuttut naalakkersuisoqatigiinnit tunuarput.
Nutaamik amerlanerussuteqalernissamik isumaqatiginninniarnerit ajornakusoorput. Inuit Ataqatigiit sivitsunngitsoq isumaqatiginninniarunnaarput, Demokraatit aamma Siumup atasinnaasumik naalakkersuisoqatiginissaannut tatiginninngillat.
Ilisimaneqareersutut inerniliunneqarpoq, Kim Kielsen ikinnerussuteqartunik Atassut aamma Nunatta Qitornai peqatigalugit, Demokraatillu tapertaralugit naalakkersuisoqatigiinnik pilersitsivoq.
Kisianni ataasinngornami unnukkut Atassut naammatsissimavoq. Partiip sinniisai naapertorlugit, suleqatigiinneq qaammatini arlalinni ingerlanerlussimavoq. Demokraatillu Atassummit naalakkersuisumut, Aqqalu Jerimiassenimut tatiginninnginnertik nalunaarutigimmassuk, Atassut naammaginnilerluni tunuarpoq.
Demokraatit siulittaasuata tulliata Randi Vestergaard Evaldsenip ippassaq Inatsisartut oqaluttarfiannit nalunaarutigaa, naalakkersuisoqatigiinnut ikinnerulersunut suli tapertaanissartik aajalangiusimagitsik.