Skip to main content

Kimip benziinamik atuineq pillugu: - Sulininni ajoqusernikuuvunga

Naalakkersuisut siulittaasuata Kim Kielsenip, biilimini angisuumi 4,7 literm V8 benziinamik ingerlatilimmik Toyota Landcruiserimik ingerlateqarnissamik annertuumik pisariaqartitinini nassuerutigaa, tamannalu qaammammut annertuumik benziinamik atuineranut nassuiaatissartaavoq, taanna qaammammut 1.200 koruuninik akeqarsinnaasarpoq.

- Sulinermi ajoqusersimasutut taaneqarsinnaagunarpunga, Kim Kielsen Sermitsiaq.AG-mit apersorneqarnermini oqarpoq, itisiliivorlu.

- Aasaanerani ukiuuneranilu minnerpaamik ullormut marloriarlunga pingasoriarlungaluunniit angallatiga alakkarlugu umiarsualiviliartarpunga. Nakkutiginninniarlugu aamma ajortumik pisoqannginnersoq nakkutiginiarlugu.

- Aap, politiitut sulillunga angalaartarsimanera suli timinniittoq nassuerutigisariaqarpara. Illoqarfimmi biilerlunga nakkutiginnillunga angalaarajuttarpunga, politikeritullu aamma tamatuma saniatigut inuit assigiinngitsut illoqarfimmi naapittarnissai uannut pingaaruteqarpoq – inuiaqatigiinni inissisimaffinnit tamanit assigiinngitsuneersut, Kim Kielsen oqaluttuarpoq.

Politiivik

Unnukkut biilertarnermini pasinartoqartillugu arlaleriarluni unilluni inuusuttunik oqaloqateqartarluni oqaluttuarpoq. Aammalu angerlamut biiliussillattaartarpoq.

- Politiiusimanera suli qamani ilunniippoq. Assersuutigalugu tankera uniffeqanngitsumik orsertarpara, naak aamma nunguliivinngikkaluartoq. Politiini alapernaaffinni biili orsereerlugu suleqatinnut tunniuttuaannarsimaneranik tamanna pissuteqarpoq, Kielsen illorsuup allaffeqarfiani Centerimi qullermi sofami issialluni eqqissilluni nassuiaavoq.

Inoqutigiit

Kim Kielsenip nulia biilernermut allagartaqanngilaq, kisianni paniata erneratalu angerlarsimaffimmi najugaqartillutik biili atortarpaat, tamannalu suliffimmut atatillugu inoqutigiinnut atorneqartussanik biilinik atuinermi akuersaarneqarpoq.

- Angalagaangama angallaterput puttasuniittoq alakkartarnissaannut piumaffigineqartarput, Kim Kielsen oqaluttuarpoq.

Piffissami januaarip aallaqqaataanit 2017-mit 2018-imi maajip aallaqqaataanut qaammammut benziinamik 1.200 koruuninik atuineq Nuummiinnaq atorneqarsimapput.

Naalakkersuisoqarfimmi pisortaq Søren Hald Møller, Kim Kielsenip naalakkersuisutut allattaa peqatigalugu Sermitsiaq.AG-mi apersuinermi peqataasoq, Kim Kielsen sulinerminut atatillugu nunanut allanut angalatilluni nammineq biilerneq ajortoq aamma attartortakkat atorneqartartut ilisimatitsissutigaa. 

Biili atuingaatsiartoq

- Uani suliami liiterimut atuineq aamma biilimut atorneqartumut sanilliullugu ukkatarineqarnissaa pingaaruteqarpoq, naalakkersuisoqarfimmi pisortaq oqarpoq, Kim Kielsenip biilia ukiunik aqqaneq-marlunnik pisoqaassusilik Toyota Landcruiseri atuinerpaat ilagigaat taassuma maluginiaqquaa, taanna liiterimut 6 kilometerit missaanni ingerlasarpoq. Biilimut allamut minnerusumut sanilliullugu Nuup aqquserngini kilometerinik marloriaammik amerlanerusunik atuititsisinnaavoq.

- Biilip pisiarineqarnera akikippoq, kisianni liiterimut kilometererpassuit ingerlaneq ajorpoq, Søren Hald Møller ilisimatitsivoq.

Taamani biilimik ilisarisimasamik pissarsinissaq Kim Kielsenimut pingaaruteqarsimavoq. Politiiugallarami Toyota Landcruiserit sulinermini atortarsimavai.

Nammataqartoqarsinnaavoq

Avatangiisinut akisussaasuullutit benziinamik taama atuitigisimik avatangiisinut ajoqutaasumik ingerlateqarsinnaagavit?

- Pujortarneq ajorpunga aamma imigassamik imerneq ajorpunga. Taamaammat nammataqarsinnaavunga, Kim Kielsen akivoq.

Namminersorlutik Oqartussat akiligassaannik angallatinnut benziinasinikuuit?

- Tamanna ersarissumik itigartitsissutigalugu akisinnaavara. Aamma taama sianiitsiginngilanga, allaat angallatiga dieselitortoq benziinamik orsersinnaallugu, Kim Kielsen qungujulluni akivoq.

Tamatumunnga atatillugu Doris J. Jensenip benziinamik atuinera imaluunniit kukkunersiuinermut ataatsimiititaliap nalunaarusiani suli naammassinngikkaa inernileerusunngilaq.

Taamaattoq oqarpoq: 

- Doris ilaqutarpassuaqartoq eqqaamaneqartariaqarpoq.

Doris J. Jensenip benziinamut akiliutaanik atornerluineq pillugu paasisaqarnerugit

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER