Skip to main content

Kimip aamma Sarap benziinamik atuinerat takuuk

Sara Olsvigip aamma Kim Kielsenip benziinamik atuinerat annertuumik assigiinngissuteqartoq.

Suliffimmut atatillugu akileraartartut akiligaannik biilinut atuinermi benziinamut atuinermi suna tulluartuunera pillugu, Doris J. Jensenip benziinamut akiliutaata atornerlunneqarnera oqallinnermik aallartitsivoq.

Kukkunersiuisoq naalagaaffimmit akuerineqartoq, Doris J. Jensenip atuineranik misissuisoq inerniliussaqarsinnaasimanngilaq, kisianni Doris J. Jensenip benziinamik atuinera misissoreerlugu ‘’atuineq kilometerinik malunnaatilinnik ingerlasarsimaneranik takussutissaqartoq’’ paasisimavaa.

Assigiinngissuterujussuaq

Namminersorlutik Oqartussat allattoqarfiannit allagaatinik takunnikkumanerit marluk aqqutigalugit, politikerit nuimasut marluk benziinamut atuinerannik paasisaqarnissaq iluatsippoq. Dorisip atuinera suleqataasa ilaannut sanilliunneqarsinnaanissaa tassani siunertaasimavoq.

IA-mi politikeriussagaanni imaluunniit Nunatsinni partiit annersaannit Siumumiissagaanni, benziinamik atuinissamut pisariaqartitat assigiinngitsorujussuusut, tassani paasinarsivoq.

Sara Olsvigip qaammatini 16-ini benziinamik atuinera 2.271,35 koruuninik naleqarpoq. Akerlianik Kim Kielsenip piffissami tassani atuinera 18.477,04 koruuninik naleqarpoq.

Kielsenip atuinera nikerartoq

Kim Kielsenip atuinera qaammammiit qaammammut nikerartorujussuuvoq, kisianni agguaqatigiisillugu 1.154,82 koruuniupput, tamannalu Doris J. Jensenip atuineranit 1.751,59 koruuniusunit annikinneruvoq, taassuma atuinerujussuani tallimanik meeraqarnerminik nassuiaatissartaqarnerarpaa, taakku ilaatigut atuarfiliaanneqartartussaammata. Sara Olsvigip agguaqatigiisillugu atuinera taamaallaat qaammammut 141,96 koruuninik akeqarpoq.

Kim Kielsenip qaammatit 16-it ingerlanerini 3.426,10 liiterinut orsersimavoq, tamannalu qaammammut 214,13 liiterinik atuineruvoq. Sara Olsvigip benziinamik atuinermini qaammammut agguaqatigiisillugu 27 liiterimik pisisarpoq.

Sara Olsvig ataatsinngornermi naalakkersuinikkut sulinermik unitsitsilluni IA-mi siulittaasutut tunuarluni nalunaaruteqartoq, Naalakkersuisunut ilaasortaanermini biilerpallaarsimanngitsoq, takusassiami takuneqarsinnaavoq.

Qaammatinit 16-iusunit qaammatini arfineq-marlunni Trolles Tankimit, Isumaginninnermut aamma Inatsisinik Atuutsitsinermut naalakkersuisoqarfimmut, Sara Olsvigip naalakkersuisuuffigisaanut, qaammammut akiligassanik nassiussisoqartarsimanngilaq.

Suliffimminut qanittoq

Kim Kielsenip atorfilittut inigisaanit siulittaasup allattoqarfianut Nuuk Centerimi allaffeqarfissuarmut meterit amerlanngillat. Taamaakkaluartoq benziinamik atuineq qaammammi ataatsimi 1800 koruunit sinnersinnaasarai, akiligassat allattorsimaffianni takuneqarsinnaavoq (juuli/17, aaqq.).

Naalakkersuisut siulittaasuata Kim Kielsenip Sermitsiaq.AG-mit apersorneqarnermini biilernikkaanini isertuutinngilaa, kisianni aamma benziinamik atuingaatsiartumik biileqarnini nassuiaatigaa, taanna liiterimut kilometererpassuarnik ingerlaneq ajorpoq.

Apersuineq uani atuaruk:

Kimip benziinamik atuineq pillugu: - Sulininni ajoqusernikuuvunga

Biilit assigiinngitsut pingasut

Naalakkersuisoqarfiit politikerit pingasut biili pillugit ima ilisimatitsipput:

  • Kim Kielsen Toyota Landcruiserimik ingerlasarpoq, 4,7 liter V8 benzinmotor, 2006-ernisat
  • Sara Olsvig Toyota RAV 4/2,0 Benzin/ TW/4WD-nik ingerlasarsimavoq, taanna 2015-imi pisiaavoq
  • Doris J. Jensenip sulinerminut atatillugu biilia Mitsubishi Outlanderiuvoq

Biilit assigiinngitsut pingasut assigiinngilluinnartumik liiterimut kilometerinik ingerlasinnaassuseqartut.

Taxat ima atuitigisarput

Nuuk Taximi pisortap Sermitsiaq.AG-mut ilisimatitsissutiginikuuaa, taxartartup ulapittup ullormut akunnerni 12-ni sulisartup aamma sapaatip-akunneranut ulluni arfinilinni sulisartup qaammammut benziinamik atuinera, 3.400 koruunit aamma 3.700 koruuninut nikerartarpoq.

Kukkunersiuinermut ataatsimiititaliap novembarip ingerlanerani Doris J. Jensenip benziinamut akiliutip atornerlunneqarneranut tunngatillugu nalunaaruteqarnissaat naatsorsuutigineqarpoq.

Doris J. Jensen benziinamut atuinini itisilerlugu apersorneqarnissani kissaatigisimanngilaa.

Suliaq pillugu tamakkiisumik paasisaqarit: Benziina pillugu sammisaq uani takuuk

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER