Kim: Inuusuttut kaammattorneqassapput
Inuusuttut amerlanerusut meeqqat atuarfianni atuarnerup kingorna piginnaanngorsaataasumik ilinniagaqalernissamut kaammattorneqassapput. Naalakkersuisut siulittaasuat Kim Kielsen ullumi Inatsisartuni akunnermi apeqqarissaarfiusumi taama naqissusiivoq.
Kim Kielsenip ullumikkut akunneq apeqquteqarfiusumi qanoq ililluni inuusuttut piginnaanngorsaataasumik ilinnialernissaannut kaammattorneqarsinnaanerannik, partiit tamaasa iliuuseqarnissaannik kajumissaarpai.
Alisakkat akii apparpata
Múte B. Egedep aalisakkat akii maanna qaffasissutsiminnit appassagaluarpata, aningaasaqarnikkut siuariartorneq qanoq qulakkeerneqarsinnaanersoq akissutiserusuppaa.
- Inuiaqatigiit suli annertuunik ajornartorsiuteqarpugut, ilaatigut meeqqat atuarfianni aamma paaqqinnittarfinni. Ullut ilaanni aalisakkat akii appassapput. Aningaasaqarnermut kinguneqartitsissanngippat qanoq qulakkeerniarpiuk, Múte B. Egede taana aperivoq, ilinniartitaanermut suliniutinut innersuussilluni.
Kim Kielsenip akissuteqarnermini inuussutissarsiornikkut amerlanerusunik suliniuteqartoqarnissaa pisariaqarnerarpaa.
Mittarfiit siuariartornermik pilersitsisut
- Mittarfinni nutaanik pingasunik sanaartornissamut aalajangerneq siuariartornermik pilersitseqataassaaq, Kim Kielsen oqarpoq, taassuma maluginiaqquaa suliffissaaleqisut aatsaat taama ikitsiginerarlugit, kisianni sinneruttut sulilersinniarnissaat taamaatinneqanngilaq.
- Isumaginninnikkut aaqqissuussaaneq aamma naleqqussassavarput, taamaalilluni taakku suliffeqarfinni atorfissaqartinneqarmata sulilernissaannut kajumissaarneqassapput, Kim Kielsen oqarpoq.