ukiortaami oqalugiaat

Kim: Ukiut tamarmik meeqqat ukiorisariaqaraluarpaat

Naalakkersuisut siulittaasuata ukiortaami oqalugiaammini sammisat assigiinngitsorpassuit eqqartorpai. Meeqqat aamma ilinniarneq, taakku marluk ingammik pingaartippai

Naalakkersuisut siulittaasuata, Kim Kielsenip (S), siorna oqalugiaatini nangeqqippaa, taamani 2016 'Meeqqat Ukiuattut' suaarutigaa.

Angusa amerlanerarpai, kisianni suli suliassarpassuaqartoq naqissuserpaa.

- Taamaammat meeqqat ukiuat nangeqqillugu suliavut ingerlateqqissavagut. Ukiummi tamarmik meeqqat ukiorisariaqaraluarpaat, ukiortaami oqalugiaammini oqarpoq.

Atuaruk: Kielsen: 2016 meeqqat ukiorissavaat

Ataatsimut akisussaaffik
Kim Kielsen qularutigisaqassagaluaruni, taava 2016-imi meerarpassuit sumiginnarneqartarnerinut aamma innarlerneqartarnerinut uppernarsaatissarpassuaqarsimavoq.

Atuaruk: Meeqqat Illersuisuat: Maannakkorpiaq iliuuseqartoqartariaqarpoq

Meeqqat illersuisuanni misissuineranit aamma angalaneranit nalunaarusiat ajornartorsiutit qanoq annertutiginerannit takutitsipput.

- Taamaattorli aamma inuiaqatigiiusugut ataatsimoorluta akisussaaffeqarpugut suliamik kivitseqataanissatsinnut. Suli meerarpassuupput inuuniarnikkut oqimaatsorsiortut ikiorneqartariaqartullu. Taakku tunuttariaqanngilagut, najukkatsinni sanilerigutsigit, ilaqutarigutsigit oqartussaasulluunniit suliffiutaanniikkutta, taama nangippoq.

Imminut toquttarneq
Meeqqat inuusuttullu akornanni imminut toquttarneq oqalugiaammi immikkut inissaqartinneqarpoq.

- Ukiut tamarluinnaasa inuusuttortatta ilaat inuunerminnik kipititsisarput. Qamuuna uummatikkut aliatsatsinneqartarpunga pisunik tusarlerneqaraangama. Inuiaqatikka kikkuugaluartulluunniit ilannguaminnik taamatut annaasaqarsimasut misiginneqatigaakka.

- Tamatta inuunitsinni aporfissaqartarpugut. Meerartagut inuusuttortagullu inuunerup unammilligassartaanut akiuussinnaasunngorlugit nukittorsassagutsigit toqqissisimasumik inuuneqarnermik, isumassuinermik asanninnermillu tunisariaqarpavut.

- Inuusuttut toqqaannartumik oqarfigerusuppassi: Ikiortissarsiortarniaritsi oqimaatsunik ajornartorsiutinillu aporfeqaleraangassi, misigigussilu nammineerlusi qaangerniarsinnaanagit. Ikiortissaqarpusi, aamma inuunissinni ingerlariaqqinissamut periarfissaqarpusi.

Ilinniarnerup nukittorsarnissaa pingaaruteqartoq
Meeqqat pillugit suliniuteqarneq aamma namminiilivinnissamik anguniakkamut tunngasumik oqaaseqarpoq.

- Meerartagut siunissaraagut. Ullutsinni namminiilivinnissamut aqqut ingerlavigiuminarsarlugu ujaqqat piiarpagut. Meerartagullu taakkuusussaapput aqqusinniakkut tassuuna ingerlasussat, oqalugiaammini oqarpoq.

Atuaruk: Nivi: Tuluttoornerup utaqqisinnissaanut akissaqanngilagut

Ilinniarneq nukittunerusoq, amerlanerusut meeqqat atuarfiannit naammassinerup kingorna piginnaalersitsisumik ilinniagaqalernissaat ineriartornermut taamaattumut piumasaqaataavoq. Kim Kielsenip aamma tuluttut allamiut oqaasiisut siullinngortinneqarnissaannik anguniagaq erseqqissarpaa, kisiannili ukiut arlaqartut qaangiuppata piviusunngornissaa takorloorpaa.

Oqalugiarneq KNR-ip aallakaatissimasaa uani takusinnaavat

- Ilinniagarissaarnitta oqaatsinullu pikkorissutsitta naalagaaffittut siunissami ataatsimuussuseqarnissamut qulakkeerinneqataaffigissavaat.

Naalakkersuisut siulittaasuat eqqartuingaatsiarpoq. Mittarfiit, aalisarneq, aatsitassat, tunngaviusumik inatsisiliornissamut isumalioqatigiissitaq, takornariaqarneq aamma amerikamiut sakkutooqarfii, tassa tamakkut sammisat ilaat eqqartorpai.

Oqalugiaat tamaat uani atuarsinnaavat

Minnerunngitsumillu aamma innuttaasunut assigiinngisitaartunut peqatigiinnissamik kajumissaaruteqarpoq.

- Qanortoq nunatsinni innuttaasugut kikkuugaluarutta tamatta Kalaallit Nunarput toqqissisimaffigalugu eqqissinartumik angerlarsimaffigisigu, oqalugiaatip naalernerani taama oqarpoq.

Powered by Labrador CMS