Kim nunat tamalaat peqataaffigisaannik unammeqataassaaq

Nunatsinni nukittunerpaaq Kim Ujarak Lorentzen Islandimi nukittuneqqusaatitsinermi peqataassaaq.

Nukittuneqqusaannermi Islandimi pisussami, Magnus Ver Magnusson Strongman Classic-imi novembarip 18-anit 20-anut ingerlanneqartussami, Kim Ujarak Lorentzen peqataassaaq.

Unammineq Magnus Ver Magnussonit aaqqissuunneqarpoq, taanna sisamariarluni nunarsuarmi nukittunerpaanikuuvoq. Unamminerni Islandimi piffinni assigiinngitsuni ingerlanneqassaaq.

Imminut tatigineruneq

- Englandimi Arnold Sportsfestivalimi ajugaanera Magnus Ver Magnussonip malinnaaffigisimavaa. Facebook aqqutigalugu saaffigaanga peqataarusunnersunga. USA-mi unammisaqattaarnermut aamma peqataasussaagaluarama eqqarsaatigeqqaarsimavara Islandiliassanerlunga. Una periarfissatsialaasoq nalilerakku unammiuaarnermi peqataaniarlunga aalajangerpunga, Kim Ujarak Lorentzen Sermitsiaq.AG-mut oqarpoq.

Nunarsuarmi nukittunerpaasimasumit taamatut saaffigineqarnini nuannaarutigaa. Nunanit allanit aamma maluginiarneqarsimalerluni malugaa.

- Nunanit allanit unammisartut piginnaasaat tikikkiartorlugit malugaara. Imminut tatiginerulernikuuvunga, tassami siornatigut unamminnginnerni pissangasarnikooqaanga. Misilittakkakka annertusiartortillugit pissangasarnikka annikinnerulernikuupput. Pissangasarnikuuvunga ilisimannginnakku suut piginnaanerinerlugit. Maanna ilisimanerulernikuuakka suut nukittuffiginerlugit, taamaattumik unamminnginnerni eqqissisimanerusalernikuuvunga. Tamanna iluaqaaq, oqarpoq.

Anguniakkat

Kim Ujarak Lorentzen nutaanik siunissamut anguniagasseqqippoq. 1.000 pund, 453 kilo missaaniittoq, aappaagu kivinniarlugu siunnerfeqarpoq.

- Nunarsuatsinni dødløftimik taama oqimaatsigisumik kivitsisinnaasut ikitsuaraapput. Angusaq angisoorujussuussaaq iluatsissinnaassagukku. Upperaara kivissinnaassallugu. Taassuma saniatigut nunani allani nukittuneqqusaalluuni unamminerni Kalaallit Nunaata maluginiarneqartalernissaa aamma angorusuppara, Kim Ujarak Lorentzen oqarpoq.

Aatsaat taama nukittutigisoq

Ukiuni kingullerni ineriartorluarsimalluni malugaa.

Powered by Labrador CMS