Kim naalakkersuisunik marlunnik toqqaavoq
Naalakkersuisuni ulluni kingullerni eqqissiviilliortoqareersorlu, Naalakkersuisut Siulittaasuata kikkut aalisarnermut/piniarnermut/nunalerinermut aamma nukissiuteqarnermut/inuussutissarsiornermut/ilisimatusarnermullu naalakkersuisuussanersut toqqarpai.
Naalakkersuisut Siulittaasuata, Kim Kielsenip (S) Naalakkersuisut marluk nutaat Inatsisartuni ullumi toqqarpai.
Naalakkersuisut marluk nutaat ukuupput:
- Jens Immanuelsen (S) aalisarnermut, piniarnermut nunalerinermullu Naalakkersuisunngorpoq
- Jess Svane (S) inuussutissarsiornermut, nukissiuteqarnermut ilisimatusarnermullu Naalakkersuisunngorpoq
Tamanna isumaqarpoq Kim Kielsen Naalakkersuisut Siulittaasuattut inissisimanermi saniatigut pinngortitamut avatangiisinullu akisussaaffimmik suli tigumminnissasoq.
Naalakkersuisut tamarmiullutik maanna ukuulerput:
- Kim Kielsen (S)
- Vittus Qujaukitsoq (NQ)
- Ane Lone Bagger (S)
- Martha Abelsen (S)
- Jens Immanuelsen (S)
- Jess Svane (S)
- Erik Jensen (S)
- Karl Frederik Danielsen (S)
Atassummi ilaasortat marluk, Aqqalu Jerimiassen aamma Siverth K. Heilmann kiisalu Siumumeersoq Nikkulaat Jeremiassen Naalakkersuisunit ippassaq tunuarnerisa kingorna, Naalakkersuisut nutaat marluk ivertinneqarput.
Naalakkersuisoqatigiinni partiit marluk
Tamanna isumaqarpoq partiit marluk naalakkersuisoqatigiilersut, Demokraatillu naalakkersuisunut tapersersuisuusut.
Inatsisartunut apriilip 24-ani 2018-imili qinersisoqarneranit maanna qulissaat Naalakkersuisuni ilaasortat taarserneqarput.
Jess Svane Inatsisartuni ilaasortaasoq maanna Naalakkersuisunngormat, Inatsisartuni sinniisutut issiasussaq, Mala Høy Kuko Inatsisartuni issiasinnaaqqilerpoq.
Jens Immanuelsen Avannaata Kommuniani kommunalbestyrelsemi ilaasortaagaluarpoq, maannali Naalakkersuisututut akisussaaffimmik tigusilluni.