Kim Leinep atuakkiaata filmiliarineqarnissaanut tapiissuteqartoqartoq

Naalakkersuisut aalajangersimapput, kulturikkut suliniutit sorliit ukioq manna naggataajusumik tapiissutinik agguaassinermi aningaasaliiffigineqassanersoq.

Ilaatigut filimiliassanut sisamanut katillugit 672.000 koruunit tapiissutigineqarsimapput. Taakkununnga ilaalluni Kim Leinep atuakkiaata, "Kalak", filmiliarineqarnissaa.

Filmmagasinet Ekko naapertorlugu filmiliornermi ilitsersuisartoq Isabella Eklöf, Kim Leinep nammineq inuunini pillugu atuakkiaata filmiliarineqarneranut ilitsersuisuussaaq, Det Danske Filminstitut aamma filmiliassap allaaserineqarnissaanut ineriartortinneqarnissaanullu upernaaq 525.00 koruuninik tapiisssuteqarsimavoq.

Eqqumiitsuliortut nersualaarneqartut

Naalakkersuisut suliniutinut katillugit en million koruunit sinnerlugit tapiissuteqarsimapput:

- Naalakkersuisut, tassunga atatillugu eqqumiitsuliortut, piffinni immikkuullarissuni nalimmassarluarlutillu nutaanik eqqarsallaqqissut, nersualaarusuppaat.

- Ilaatigut takuagut nipilersortartut nittartakkakkut naapeqatigiittarfiit atorlugit meeqqat inersimasullu aliikkusersoraat ulluinnagullu oqinnerulersillugit, Kultureqarnermut Naalakkersuisunngoqqammersoq Katti Frederiksen tusagassiorfinnut nalunaaruteqarnermi oqarpoq.

Filmiliassat sisamaasut saniatigut, kulturikkut suliniutit assigiinngitsut arfinillit katillugit 497.000 koruuninik tapiiffigineqarsimapput. Ilaatigut tapiiffineqarsimapput Ujarneq Fleischerip meeqqanut inuusat atorlugit isiginnaagassiaa, Naleraq Lightsip qullernik eqqumiitsuliaa illoqarfinni arlalinni ingerlanneqartussaq, Liima Inuikkut angalanerat kiisalu kujataani illoqarfinni assigiinngitsuni assinik saqqummersitsineq.

Kulturikkut sulialinnut 36-nut aningaasaliissutit

Atuakkiortut marluk katillugit 254.000 koruuninik aningaasaliiffigineqarput. Tassaasut Arctic Mediap meeqqanut atuakkiaa “Suna Immikkut Piginnaasaraara?” kiisalu sanaluttartoq Kim Kleist-Eriksen pillugu eqqumiitsuliornermut atuakkiaq ”Eriagisaq”.

Naalakkersuisut aamma oqaluttuaraat, eqqumiitsuliortut 36-t kulturikkut suliaqarnerannut 2020-mi aningaasaliissuteqarsimallutik. Kulturimik sulialinnut aningaasaliissutissanik ataavartumik qinnuteqartartut coronap tuniluunneranit katerisimaartarnermut killilersuinermit upernaarli eqqugaasimapput.

Kulturikkut sulialllit qaammammut 22.000 koruuninik aningaasaliiffigineqarput, katillugillu 2.442.000 koruunit agguanneqarsimallutik.

- Aningaasaliiffigitittut ilagaat nipilersortartut piffissami katerisimaartarnermut killilersuinerup nalaani, nutaanik nipilersuusiortut, Naalakkersuisut ilisimatitsipput.