pissaaneqarniuunneq
Kim Lars-Emililu akerlereeqqipput
Siumup siulittaasussarsiornissaanut akuliuttut suli ilaqqipput. Lars-Emil Johansen, Vittus Qujaukitsumik illersuisoq, Kim Kielsenimut mianersoqqusivoq naalakkatut pissusilersoqqunagu
Kim Kielsen aamma Lars-Emil Johansen kiisami aaqqiagiinnginneq akiorniarlugu maajip 29-at ataatsimiipput. Tamanna pivoq politikkerit taakku nuimasut martsip 23-ni isumaqatigeereersut qaammammut ataasiarlutik ataatsimeeqatigiittarniarlutik partiip iluani torersumik oqallinnissaq minnerunngitsumillu eqqissisimanerusoqarnissaa anguniarlugu. Isumaqatigiissulli taanna aallartinnermini aporfissaqareerpoq.
AG taama allappoq.
Ataatsimeersuarnissaq Kim Kielsenip Vittus Qujaukitsumit unammillerneqarfia qanilliartortillugu ajornartorsiutit minnerulinngillat.
Kim Kielsen aamma Lars-Emil Johansen partiimi illuatungeriittut inissisimasut partiip siunissaata oqallisiginerani isumaqatigiinngittupilussuupput.
Kim Kielsenip inissisimanera patajaappianngitsutut ippoq amerlasuut akerlianik isumaqarunaraluartut. Vittus Qujaukitsoq kingullermik Inatsisartunut qinersinermi qinigaanngitsoq, qanittumi Siumup immikkoortoqarfiisa anginersaanni Nuummi siulittaasutut qinerneqarpoq.
AG-p Siumup immikkoortoqarfiinut attaveqaqattaarnerani qanittumi paasinarsivoq Kim Kielsenip aqutseriaasia apeqquserneqartalersoq. Immikkoortoqarfiit arlallit siulittaasumut qineqqusaartut suli ataatsimik ilanissaat ujartorpaat partiimi eqqissisoqarnissaa anguniarlugu.
Maannamulli Kim Kielsen aamma Vittus Qujaukitsoq kisiartaallutik partiimi pissaaneqaqisumi siuttussatut sassarput. Qinigaasorlu naalakkersuisuni siulittaasunngussagunavippoq.
Partiip immikkoortoqarfiisa, tassanilu illoqarfiit anginersaata tulliani Sisimiuni immikkoortoqarfik ilaalluni, oqariartuutaanni qitiuvoq Siumut siulittaasoqartariaqartoq partiimi ataatsimoortitsisinnaasumik
Qineqqusaarsinnaasut ilagisinnaavaat Hermann Berthelsen ukiut 20-it sinnerlugit Sisimiuni Qeqqatalu Kommuniani borgmesteriusimasoq. Taanna Inatsisartuni sulilernissamut pilerisussinnaalluni oqamisaareerpoq. Qinersinerni arlalinni qinigaalluartarpoq, suniarnerali suli nalunarallarluni.
- Siulittaasussarsiornermut oqaaseqarusunngilanga, siulittaasussatut sassarusussinnaanerluni aperineqarami akivoq.
Aleqa Hammond suli tunulequtaavoq - tamanna pillugu AG-mi paasisaqarnerugit: