Kim Kielsen: Sukkulluunniit imminut iluanaartinniarlunga suliaqarsimanngilanga
Naalakkersuisut Siulittaasuat Kim Kielsen pissaanermik atornerluinerarlugu illuatungingiiuttut partiiannit IA-mit pasillerneqarpoq. Kim Kielsen oqarpoq, pasilliutigineqartut tunngavissaqanngitsut, umiatsiamik attartortitsineq pisassiissutilluunniit eqqarsaatigalugit.
Kim Kielsenip (S) Sermitsiamut oqaluttuaraa, umiatsiani ikinngumminut ajornartorsiortumut attartortissimallugu, pissaanermillu atornerluineraanerit imminullu iluaquserniarluni sulineraanerit tunngavissaqanngilluinnartut.
Inuit Ataqatigiit Naalakkersuisut Siulittaasuannut Kim Kielsenimut sakkortuumik pasilliuteqareersut, siulittaasoq aviisimut Sermitsiamut taamatut oqarpoq. Taassuma illuatungiliuttuni inuttut saassunneqartarnini pasillerneqartarninilu naammagiunnaarlugit killissani tikissimanerarpaa.
Kim Kielsenip ikinngutaatalu ikinngutigiittut iliuuseqarnerat, illuatungiliuttunit politikkikkut aningaasatigullu iluanaarniarnertut pasilliutigineqarpoq.
- Nuliaralu umiatsiarput ikinngutinnut attartortissimavarput, taassuma umiatsiaata motooria nipisanniarnerup nalaani ajortissimammat. Napparsimallungalu sanngiinninni, kingusinnersukkut paasinarsisoq uummalliotunga, ikiortarsimaqimmanga (ikinngutaata) ikioqqissavarput pisariaqartitsilerpat, Kim Kielsen Sermitsiamut oqarpoq.
- Inatsisit malitarisassallut maleqqissaarlugit suut tamarmik ingerlanneqarput. Nalunaarsugassat tamarmik nalunaarsorneqarsimapput, aamma KNAPK-p malittarisassai naapertorlugit ikinngutitta neqeroorutigisaralui affaannanngortissimavavut. Umiatsiarput inuttaqartinnagu atukkiupparput. Ikinngutnga ikiuinnarniarlugu taamaaliorpugut umiatsiallu attartorneqarnera aningaasannassutiginagu, taamaallaat ikinngutitta umiatsiaminut atatillugu aningaasartuutinut aalajangersimasunut (sillimmatinut il.il.) akissaqarnissaa siunertaavoq, Kim Kielsen nassuiaavoq.
IA-mit pasilliutigineqartut ilagaat, Nuummi Maniitsumilu nipisattassiissutinik qaffaanermut Kim Kielsen sunniuteqarsimasoq, taamaalillunilu umiatsiaminik nipisanniarnermut attartortitsinermigut aningaasannassimasoq. Siulittaasulli taamatut passilleqarnini ulluliinermigut akerlilerpaa.
- Nunami aqutsiveqarfinni aalajangersimasuni siorna ukiorlu manna nipisattassiissutinik iluarsiineq, ikinngutimma umiatsiamik attartorneranut attuumassuteqanngilluinnarpoq. Ikinngutimma umiatsiaa apriilip 26-ani motooriiarpoq, KNAK-llu pisassiissutinik qaffaasoqarnissaanik qinnuteqaataa Naalakkersuisunit maajip aqqarnani suliarineqarluni.
Oqaluttuaq tamaat aviisimi Sermitsiami tallimanngorpat atuaruk.