Kim Kielsen: Sassaqqinnissamik eqqarsaateqarneq suli inissivinngilaq
Nunatsinni partiit annersaanni Siumumi siulittaasussamik julimi qinersisoqalerpat unammisoqalaavissasoq naatsorsuutigereerneqarsinnaavoq. Erik Jensen siulittaasussatut sassarluni nalunaaruteqareerpoq, tusagassiorfiit arlallit Kielsen sassaqqinnerarlugu naqissuseereeraluarput, taamaattorli Kielsen-ip erseqqissaatigaa sassaqqissanerluni aalajangivinnani, suli inissitassaqarnerarluni
Siumup aammalu Naalakkersuisut siulittaasuat, Kim Kielsen (S) eqqissisimaqisoq aammalu tatitoqisoq ataasinngormat aviisimit Sermitsiamit apersussallugu najorparput.
Tusagassiorfiit arlallit inuit allat tusarfitik uppernarsaasoralugit ilisimatitsisarput Kielsen aalajangereersimasoq Siumumi siulittaasussatut sassaqqinniarluni, inuttaatali nunatsinnik inuinillu sullissinissaminik pingaartitseqisup Sermitsiamut erseqqissaatigaa sassaqqissanerluni inaarutaasumik suli aalajangernani.
Nalilersuinissat pingaarutillit
– Siusinnerusukkut oqaatigereerpara tunuarsimaarnaviarnanga partiitsinnut siulittaasussatut sassaqqissinnaanissannut. Tamanna pivoq uummatinnik suliaritinnera iluatsilluartumik qaangiutereermat. Tassami taamani november 2018-mi Siumumi ilaasortaqatikka nalunaarfigaakka tullissannik ujarlilereeqqullugit, taamanimi peqqiilliornera sakkortusiartuinnavippoq, aviisimut Sermitsiamut Kim Kielsen oqarpoq.
- Piffissami tamatumani pisungaarsinnaanngilanga uneqattaartariaqartarlungalu qasujangaarama. Iluatsilluartumik suliaritinnissara sioqqullugu arlaleriarlunga napparsimavimmi uninngasariaqartarnikuuvunga. Maanna suliaritereernerma kingorna ajunngeqaanga aamma timikkut nukittuunngoqqippunga. Taamaammat timikkut pisinnaasama killeqaleraluttuinnarsimanerigalua anigoreerakku, peqqissusera apeqqutaajunnaarnikuuvoq sassaqqissinnaanissannik aalajangerniarninni, taamaattorli uannut pingaaruteqarpoq ilaquttakka tunuliaquttakkalu peqatigalugit nalilersuinerma naammassinissaanut, Kim Kielsen oqarpoq.
Kim Kielsenip apersorneqarnera tamaat aviisimi Sermitsiami tamakkiisumik atuaruk. Aviisi uani pisiarineqarsinnaavoq: