Kim Kielsen: Mittarfiit mikinerit maanna sanaartulissavavut
Kim Kielsenip (S) naqissuserpaa nuna tamakkerlugu sullillugu. Pingaartitakka tassaapput attaveqaatit, meeqqat inuusuttullu atugarisaat kiisalu avatangiisit, siunissami ineriartornissatsinnut tunngaviusut, Kim Kielsen isornartorsiuisartuni, oqartussaaqataaneq, ukioq qaangiutilersoq siunissarlu pillugit sorpassuit tikillugit ammasumillu oqaloqatigineqarnermini oqarpoq.
Kim Kielsenip (S) nunami tamarmi kikkunnut tamanut attaveqaatinik akikinnerusunik pitsaanerusunillu peqarusuppoq.
- Attaveqaatit ilinniagaqartitsinerillu aningaasarsiornikkut siuariartornermut, ineriartornermut ataqatigiinnermullu tunngavissat pingaarnersaraat. Taamaattumik maanna mittarfiliortitsernissamik aalajangernitta kingorna nunap sinneranut kinguneqaatissat, aammalu kikkunnut tamanut iluaqutaasumik attaveqaatinik pitsaanerusunik akikinnerusunillu peqalernissatsinnut qanoq iliussanerluta misissussavagut.
Kim Kielsen aviisimut Sermitsiamut taama oqarpoq.
Tamanna erseqqissarpaa nunap ineriartornera pillugu sivisuumik oqaloqatigineqarnermini, tassanilu pingaartumik tikippai nammineq suut sulissutiginerlugit, ukiullu ingerlanerani assigiinngitsorpassuarnit isornartorsiorneqartarsimanini akissuteqarfigalugit.
Soormi saqqumilaarnerunngilatit malugitillugulu illit nunami maani siuttuullutit suliarlu tamanna nersorneqaatissaralugu?
– Nammineerlunga suleriaaseqarpunga kinaassusera aallaavigalugu. Pinngortitamik atuisartuuvunga aammalu pinngortitami pinngortitarlu pillugu sulillunga. Tassaniippoq maniguuttuunera, tamannalu politikkimi suleriaatsinnut sunniuteqarunarpoq. Imatorsuaq salliuniarnissara atorfissaqartinngilara. Inuttut angusakka naammagisimaarpakka, Kim Kielsen oqarpoq.
Suleqatigiinneq
– Suleqatigisakka tusaaniartarpakka ataatsimoorlutalu aalajangiisarpugut tamatta isumaqatigisinnaasatsinnik. IA-meersup Sara Olsvigip kisermaassiniartutut taasimammanga tamanna nammineq akisussaaffigissavaa. Piumasariinnartarsimavara inatsit malinneqassasoq. Tamanna kisermaassineruppat nammineq taamatut paasisimassavaa, Kim Kielsen avisiimut Sermitsiamut oqarpoq.
Kim Kielsenimik apersuineq takinerusoq, aviisimi Sermitsiami atuarsinnaavat. Aviisi uani ataani pissarsiarisinnaavat: