Pinngortitami ajunaarnersuaq
Kim Kielsenip qimagussorneqarsimasut naapissavai
Naalakkersuisut Siulittaasuat Kim Kielsen Avannaatalu kommuniani ikaarsaariarnermut ataatsimiititaliami siulittaasoq Palle Jerimiassen sapaatip akunnerata matuma tulliani Uummannaliassapput Nuugaatsiamit Illorsuarniillu innuttaasut qimagussorneqarsimasut ataatsimeeqatigiartorlugit
Uummannap nunaqarfiini Nuugaatsiami Illorsuarnilu inuttaasut qimagussorneqarsimasut sapaatip akunnerata tulliani politikkerinit tikeraarneqassapput.
Tassani Naalakkersuisut siulittaasuat Kim Kielsen Avannaatalu Kommuniani ikaarsaariarnermut ataatsimiititaliami siulittaasoq Palle Jerimiassen – tamarmik siumumeersut – qimagussorneqarsimasut naapikkiartorlugit Uummannamukassapput.
- Nuugaatsiap Illorsuillu tassaarsuarmit nalaanneqarmatali qaammatut marluk maanna ingerlareerput. Innuttaasut najukkaminnit qimagussortinneqarsimasut pissusissamisoorluinnartumik kissaatigaat nutaamik atugaqalerlutik nalinginnaasumik inuuneqaqqilernissartik. Innuttaasut najukkaminnit qimagussortinneqarsimasut toqqissisimasumik atugassaqarlutik inuunerminnik ingerlatsilernissaannut ikiorneqarnissaat Naalakkersuisut kommunillu aamma kissaatigaat, Namminersorlutik Oqartussat tusagassiuutinut nalunaarutaanni taakku oqarpoq.
Innuttaasut pineqartut inisseqqinnissaannut nutaamillu inuuneqalernissaannut ikiuiniarnerup killiffianik oqaluttuarnissaq ataatsimiinnermi siunertarineqarpoq.
- Taamaammat qanoq periarfissaqarnerannik ataatsimoortumillu naligiimmik ikiorneqarnissaannut atugassarititat suunerannik pineqartut ilisimatinneqarnissaat pingaaruteqarpoq. Suliniutit siunissamilu periarfissat suunerannik oqaluttuariartorluta kiisalu innuttaasut uummammiuinik tusarnaariartorluta sapaatip akunnerata matuma tulliani Uummannaliarnissarput qilanaarivarput, Kim Kielsen Palle Jerimiassenilu oqarput.
Innuttaasunik najukkaminnit qimagussorneqarsimasunik ataatsimeeqateqarnissat Uummannami atuarfiup aulaani ingerlanneqassapput ulluni 22. aamma 23. aggusti 2017, paasissutissiarineqarpoq.