Kim Kielsenip qanoq pinissaa ataasinngorpat aalajangerneqassaaq
Siumumi immikkoortortaqarfiit akissuteqarnissaat tallimanngornermut aggustip 23-anut killeqarpoq. Siumumi siulersuisuunerit Kim Kielsenip siulittaasutut inissisimanera pillugu ataasinngornermi ataatsimiissapput.
Kim Kielsenip siulittaasutut inissisimaannarnissaa tapersersornerlugu imaluunniit Siumut immikkut ittumik ataatsimeersuassanersoq taamatut nutaamik siulittaasussamik toqqaasoqariissanersoq pillugu apeqqut, Siumut immikkoortortaqarfiisa akinissaannut ullunik qulinik piffissalerneqarsimapput. Piffissaliussaq qaangiutereerpoq, Siumumilu siulersuisuunerit akissutinik kisitsisussanngorlutik. Immikkoortortaqarfiit aalajangernerat pillugu Siumut siulersuisuuneri ataasinngorpat ataatsimiissapput.
- Immikkoortortaqarfiit tamakkerlutik suli akinngillat, ataasinngorpalli pilersaarutit malillugit ataatsimiittoqassaaq, Mikael Petersen Sermitsiaq.AG-mut ilisimatitsivoq.
Taassuma ilisimatitsissutigaa immikkoortortani ilaasortat ulluinnarni aamma suliassaqartartut, ilaallu akissuteqarnissaminnut periarfissaqanngitsooratarsinnaasut.
Tatiginninnginneq
Siumut sinnerlugu ilaasortat nuimasut arfineq-marluusut Kim Kielsen partiimi siulittaasumittut tatigiunnaarlugu aggustip aqqaneq-aappaanni nalunaaruteqareersullu, apeqqut immikkoortortaqarfinnut nassiunneqarpoq.
Inatsisartuni ilaasortat arfinillit kiisalu aatsitassanut suliffeqarnermullu naalakkersuisoq, Erik Jensenip, Kim Kielsen siulittaasutut tatigiunnaarlugu nalunaaruteqarput, tunuartinneqarnissaalu piumasaralugu.
Nalunaaruteqareernerup kingorna Siumumi ulluinnarni aqutsisut, siulersuisuunerit Siumullu Inatsisartuni gruppiata Kim Kielsen ataatsimeeqatigaat. Demokraatit Kim Kielsenimik tatiginninnertik aamma ataatsimiissutigaat.
Immikkoortortaqarfiit tapersersuipput
Sermitsiaq.AG-p immikkoortortaqarfiit illoqarfinniittut tusarniarfigalugit sianerfigai. Immikkoortortaqarfiit oqaloqatigineqartut amerlanerussuteqarluartut Kim Kielsenip partiimi siulittaasuuinnarnissaa tapersersorpaat.
Partiimilu allattaaneq isumaqarpoq akissuteqartut maanna tiguneqareersut ersarilluinnartumik takutitsisut. Taakkulu ataasinngorpat aalajangiiffigineqassapput.
- Akissutit tigoriikkagut assiliamik ersarilluinnartumik takutitsipput. Ataatsimiinnissaq pilersaarutit malillugit ingerlanneqassaaq, Mikael Petersen oqarpoq.
Kim Kielsenip avammut saqqummiutereerpaa Siumut tulliani ataatsimeersualerpat, tassa aasamut 2020-mi, siulittaasutut sassaqqinniarani. Siulersuisuunernili issiasussatut sassarsinnaanini eqqarsaatersuutigaa.