Kim Kielsenip oqalugiaataa: Inuiaqatigiittut tamatta atorfissaqartinneqarpugut

Kim Kielsenip oqalugiaataa tamaat uani atuarneqarsinnaavoq:

Sulisartut ulluanni tamassi qamannga pisumik pilluaritsi. Siumumiit pingaartitatta ilagaat maajip aallaqqaataa nunarsuaq tamakkerlugu sulisartut ulluat. Ulloq nunatsinni sulisartut peqatigalugit nuannersumik nalliussisagarput, aammalu nunatsinni innuttaasut tamatta ullorsiortarfipput tassami ulloq manna 1979-simi nunatsinni Namminersornerulerneq eqqupparput.

Aalisakkeriviit sulisussaaleqisut sulisartunut sulisuminnut pitsaanerusumik atugassaqartitsisariaqarput

Nunarsuatsinni aalisagaq aatsaat taama neriumaneqartigaaq. Tamannalu aalisartortatsinnut qujanarluinnar-tumik aningaasaqarnikkut pitsaasumik sunniuteqarpoq. Siumumiillu isumaqarpugut piffissanngortoq suliffissuarni sulisut ullumikkornit atugarisaat pitsaanerungaartumik inissinneqartariaqartut. Ukiunimi kingullerni politikkikkut annertuumik nunatsinni aalisakkat naleqarnerulersinnissaat anguniartuarparput, taamaakkaluartorli suliffissuarni sulisussaaleqineq tusarsaagaluttuinnarluni. Taamaattumik nutaamik eqqarsartariaqarpugut. Periarfissaapput suliffissuarni sulisartut sulisut qaammammusiaqalersinneqarsin-naanerat, piginnaasaqassutsikkut allagartalersorneqarsinnaanerat il. il. tassa Siumumiit pingaartilluinnarparput sulisartut atugaasa pitsanngorsarnissaat, aammalu nunaqavissut akisussaaffimmik annertuumik tigummiartunik atorfinitsinneqarsinnaajuarnissaat.

Inuusuttut suliaqanngittut

Inuiaqatigiittut tamatta atorfissaqartinneqarpugut pisussaaffeqarlutalu. Taamaattumik sulisartut qasujaallusi sulisusi peqatiseraassi, inuusuttut 2800-t missaanniittut ullumikkut suliffeqaratillu ilinniarfinniinngittut inuiaqatigiinni sulinikkut peqataalernissaat inuiaqatigiillu assakaasuinik kaavisitseqataalernissaannik ikiuuteqataalernissaannut sulinitsinni. Suliffeqarfissuarnimi massakkut sulisussaaleqinerit atuupput, taakkulu inuttassaqartariaqarput. Tamattami inuttut ataasiakkaatut ilinniarsimasuugutta ilinniarsimasuunngikkuttaluunniit atorfissaqarpugut nunatsinnullu pisussaaffeqarluta.

Utoqqalinersiat

Utoqqalinermi periarfissalinnut suliinnarsinnaanissap periarfissaajuarnissaa Siumup politikkeraa. Taamaat-tumik utoqqalinersiuteqartut saniatigut siornatigornit annertunerujussuarmik isertitaqarsinnaalernerat pilersinnikuuarput. Tassami utoqqartatta ukiorpassuarni tulluusimaarutigalugu sulisimanerminni misilittagarpassui inuusunnerusunut ingerlateqqinneqarsinnaajuartariaqarput. Assaallu sulisinnaasut amerlanerpaat nunatsinni sulinissaat nunatta namminiilivinnissaanut sulinermi pisariaqartippagut.

Sulisartut nuttarsinnaanerat

Ullumikkut sulisartut sumiiffimmiit sumiiffimmut nuttarsinnaanerat periarfissaqarluarpoq. Taamaattorli sulisartukkormiut meerartallit nuunniarneranni suli meeqqerivinnut pitsaasumik periarfissinneqartarnerat amigaataavoq, taamaattumik kommunit kaammattorumavakka, pingaartumik sulisussaaleqiffiusuni meeqqeriveqarnikkut immikkut aaqqissuusseqqullugit. Tassami meerartavut nuannersumik peqqinnartu-millu meeraasinnaasariaqarmata.

Inissialiortiterneq

Ingerlatseqatigiiffiit Namminersorlutik oqartussanit pigineqartut inissialiortiternikkut ikorfartueqataanissaat piumasarinikuuarput, taamaattumillu maanna ingerlatseqatigiiffiit sulisartuminnut inissialiornissaminnik pilersaarusiuleruttorput. Tassami sulisartut inissiani nutaani ineqarsinnaasariaqarput, maannakkummi inissiat nutaat akisoorujussuutillugit attartortinneqartarput. Tamanna aaqqinneqartariaqarpoq, sulinerlu aallartereerpoq.

Aap, sorpassuartigut atugarissaarnerulersimavugut, kisianni suli suliassaqaqaagut.

Isumaqarpugullu ukiuni makkunani nunarsuarmi teknikkikkut siuariartornerujussuarmi nunatsinniit akuulluartugut peqataallutalu, tamanna tulluusimaarutigisassavarput, inuit ikittunnguulluta nunarsuarmi sorpassuartigut malinnaalluta ingiaqataasinnaagatta.

Inuiaqatigiit tamatta atugarissaarnikkut ineriartoqqinnissarput salliutillugu meerartatta ajunngitsumik perornissaat qulakkeerniarlugu Siumumiit ingerlaqqissaagut, taakkuuppummi siunissami sulisartuullutik nunatsinni kivitseqataasussat.

Nunatsinni innuttaasut atugarisaasa pitsanngorsarnissaat pingaarnerpaatillugu Siumut ingerlaqqissaaq. Sulisartut meeqqat, ilaqutariit meerartallit, utoqqaat, innarluutillit, napparsimasut siusinaartumillu pensionisiallit ilinniartullu atugarisaat pitsaanerulersinniarlugit aaqqissuusseqqinnerit Siumup sulissutiginiarpai.

Sulisartut, suleqataalluarnissinnut qujanarujussuaq, suleqatigeeqqinnissarpullu qilanaaraarput.

Tamassinnut qujanaq, ullorsiornissinni tamassi pilluaritsi.

Kim Kielsen, Siumup siulittaasua