Kim Kielsenip naalakkersuisooqatigiit nutaat saqqummiuppai
Kim Kielsenip Ineriartorneq, patajaassuseq toqqissisimanerlu Kim Kielsenip naalakkersuisooqatigiivisa najoqqutarissavaat, naalakkersuisooqatigiit nutaat Demokraatit Nunattalu Qitornai peqatigalugit tusagassiortunik katersortitsinermit saqqummiunneqarput.
Kim Kielsenip naalakkersuisooqatigiit nutaat, Inatsisartuni 31-nik ilaasortaatitaqartumi 17-iullutik amerlanerussuteqartitsisussat saqqummiuppai. Naalakkersuisut Siulittaasuata Demokraatit naalakkersuisooqatigiinnut tikilluaqquai, suleqatigiinnerulernissamullu qilanaarnerarluni.
- Anguniakkatta qanoq anguneqarnissaat pillugu nalilersueqatigiissimavugut. Maannamut angusaqarsimaqaagut, sulili nutaanik unammilligassaqarpoq. Nuannaarutigaarput Demokraatit naalakkersuisunut ilaalernerat, Kim Kielsen tusagassiortunik katersortitsinermi oqarpoq.
Demokraatini siulittaasuugallartup Nivi Olsenip sapaatit akunnerisa arlallit matuma siornatigull oqaatiginikuuaa, naalakkersuisooqatigiinnut ilanngunnissaq siunertaralugu isumaqatiginninniarnissamut piareeqqallutik, erseqqissaatigaali aalajangiiniarneq oqitsuinnaasimanngitsoq.
- Ulloq uatsinnut angisoorujussuusimavoq, oqaatigerusupparalu naalakkersuisooqatigiinnut ilanngunnissamik aalajangerniarneq oqitsuinnaasimanngitsoq. Aaalajangersinnaasimagaluarparput ikorfartortaaginnarnissarput, isiginnaartuuginnartarnerli uagut atugarinngilarput. Akisussaaffimmik tigusisarpugut, maannalu naalakkersuisooqatigiinnut ilaalerluta, Nivi Olsen oqarpoq.
- Naalakkersuisooqatigiinnut ilaalissagutta piumasaqaatigisimavarput, akileraarutinik akitsuutinillu nutaanik atuutsitsisoqalernissaa, Nivi Olsen erseqqissaavoq.