Mittarfimmut aqqusineq

Kim Kielsenip aqqusinniorneq aallartitseqataaffigaa

Qaqortumi ineriartortitsivissat nutaat – Qaqortullu eqqaani mittarfiliorfiginiarneqartup tungaanut – aqqusinniorneq tallimanngormat oktoberip 31-anni, aallartippoq

Qaqortoq
Aqqusineq nutaaq Qaqortumi eqqaamiuinullu suliassaqartitsivoq

Kommune Kujallermi borgmesteri, Jørgen Wæver Johansen, aqqusinniorfigineqartussap suliralugu aallartinneqalernerani nivariaqqaartussanngorami kommunalbestyrelsimi partiit sinniisui peqataaqqullugit qaaqquvai. Taamaalillutik kommunalbestyrelsimi ilaasortat Simon Simonsen, Siumumeersoq, aamma Inuit Ataqatigiinneersoq, Kelly Berthelsen, nivariarnermi siullermi aamma nivariaqqaaqqataapput. Taakku saniatigut Naalakkersuisuugallartuni siulittaasoq, Kim Kielsen, aamma nivariaqqaarnermi nivaattamik tigummiartunut ilaavoq.

Kim Kielsen ulluni makkunani Kujataaniippoq qinersisartunik ataatsimiititsinernut arlalinnut peqataajartorluni.

– Mittarfiliassaq uagutsinnut kujataamiunut pingaaruteqarluinnartuuvoq, siunissarlu eqqarsaatigalugu isumalluarneroqqilernissamut toqqammavissat pingaaruteqarluinnartut taanna ilagisussaavaat, Kommune Kujallermi borgmesteri, Jørgen Wæver Johansen, oqalugiarnermini oqarpoq.

Taamaalillutik Qaqortoq Entreprenør Forretning-ip, QEF-ip, suliffeqarfiup aqqusinniassap suliariumannittussarsiuunneqarnerani ajugaasup sulisuisa aqqusinniassaq piffissami tulliuttumi suliaralugu ingerlassinnaalerpaat. Aqqusinniassaq taanna kilometerit arfinillit qaangilaarlugit takisussueqartussaavoq, Qaqortullu eqqaani ineriartortitsivissap nutaap – mittarfiliorfiginiarneqartullu – tungaanut aqqutaalertussaalluni

Aqqusinniassap teknikikkut suliassartaa pissangartoq, pinngortitaq kusanarluinnartoq avatangiiseralugu suliarisussanngorparsi – naatsorsuutigaaralu aqqusinnissaq piffissaq eqqorlugu naammassineqarumaartoq – naammassineqarunilu tassaalersimassasoq aqqusineq kusanarlunilu isumannaatsoq – avatangiisinullu tulluartoq, Jørgen Wæver Johansen-ip, suliffeqarfiuo suliarittussanngortup najuuttui pilluaqqugamigit taama oqarpoq.

Jørgen Wæver Johansen-ip ilanngullugu oqaatigaa Qaqortup eqqaani mittafiliariniarneqartup 2018-imi atuutsilernissaa suli isumalluarfigalugulu qilanaarigini, tusagassiorfinnut nalunaarummi allassimavoq.

Powered by Labrador CMS