Skip to main content

Kim Kielsenip Aleqa Hammond atorfinitsikkaa

Siumup siulittaasuata, Kim Kielsenip, illuatungiliuttut tupaallaatigeqisaanik siulini atorfinitsippaa

Aleqa Hammond, Siumumi ilaasortaq, partiip siulittaasuanut, Kim Kielsenimut siunnersortitut atorfinitsinneqarpoq. 

- Ale Hammondi ullutsinni politikkerini pikkorinnersaat ilagaat. Marsip 12-iani 2013-imi qinersisoqarmat 6.818-inik qinerneqarnerata takutippaa politikkikkut qanoq piginnaasaqartigisoq. Piginnaasaalu atorluartariaqarpoq. Aamma tuluttut attaveqatigiissinnaaneq pikkoriffigaa, tamannalu Thulemut tunngasunik isumaqatigiinniarnitsinni iluaqutigissavarput, Kim Kielsen nassuiaavoq, nangillunilu;

- Siumup - uangalu nammineq – Aleqa Hammond qujassutissaqarfigaarput. Taassumap Naalakkersuisuni siulittaasunngortinnikuuaanga. Taannaqanngikkaluarpat ullumi Naalakkersuisuni siulittaasuusimassanngikkaluarpunga. 

Atorfinitsinneqartoq atorfittaani ingerlariaqqinnissamut aqqutitut isigaa. 

- Partiip pisariaqartippanga piareersimavunga. Taamaammat nuannaarpunga, Aleqa Hammond Sermitsiaq.AG-mut oqarpoq. 

Illuatungiliuttut kamattut
Inuit Ataqatigiit siulittaasuata, Sara Olsvigip, atorfinitsitsineq Siumut kammalaatersortuuneranut takussutissat ilagigaat oqaatigaa. Taassuma aamma oqaatigaa piaartumik Inatsisartuni apeqquteqaasiorniarluni immaqalu tatiginnikkunnaarnermik taasititsinissamik siunnersuuteqarniarluni. 

Partii Naleqqami siulittaasup, Hans Enoksenip, atorfinitsitsineq aamma tupaallaatigaa. 

- Tusamisaaraluarakku Per Berthelsen atorfimmut tassunga neqeroorfigitissimasoq, taamaammat tupaallappunga. 

Sulisitsisut aamma tupaqqasut naammattoorpagut. 

- Taama pisoqarnissaa takorloorsimanngilarput. Maanna Anda Uldumip Palle Christianseni atorfinitsinnissaa utaqqiinnalerparput, Sulisitsisuni sulisoq kinaassutsiminik isertuusserusuttoq taama oqarpoq. 

(PAASISSUTISSIISSUT: Allaaserineqartoq salloqittaavimmi allaaserineqarpoq)

Forsiden lige nu

SENESTE NYHEDER