Kim Kielsenip akunnattooruterujussua

Inatsisartut ukiaanerani ataatsimiinnissamut oqaluuserisassat nutaat saqqummiuppaat, tassani aalisarnermut inatsisissaq nutaaq nassaassaanngilaq. Taanna ilaanngilaq. Suna nassuiaatissartaraa?

Qinersineq pissutigalugu aalisarnermut inatsisip taamaatinneqartumut assingusumik Naalakkersuisut saqqummiussiniartut, Aalisarnermut Naalakkersuisup Erik Jensenip naalakkersuisoqatigiit avissaannginneranni nassuiarnikuugaluarpoq.

Tupigusunneq aamma kamanneq annertooq

Tamanna annertuumik tupigusutsitsivoq, KNAPK-mit aamma Sulisitsisunit 2017-imi siunnersuutip allanngortinneqannginnissaa kamaatigineqarpoq, siunnersuullu akuerineqassappat inuiaqatigiit aningaasaqarnerat eqqarsaatigalugu akisunaarneqarnissaa ammasumik nassuerutigaat.

Ukioq mannalu ukiaanerani ataatsimiinnissamut tunniussinissamut piffissarititap qaangiutinnginnerani Naalakkersuisut tunniussinngimmata, annertuumik tupigusuttoqarpoq. Naalakkersuisut aalisarnermut inatsit septembarip 21-anni kalerriutiginiarlugu Inatsisartut siulittaasoqarfiannut ilisimatitsipput. Ulloq taanna eqquutsinneqanngilaq. Inatsisartut Siulittaasoqarfia nalunaarfigineqarsimanngilaq, Sermitsiaq.AG-p tamanna tusarpaa, taamaattumillu ukiaanerani ataatsimiinnerup kinguartinneqarnera pissutigalugu suliarineqartariaqartumi, oqaluuserisassani nutartikkani ilaanngilaq.

Naalakkersuinikkut imminut pisarineq?

Kisianni inatsit pingaarutilik, Nunatsinni aningaasaqarnikkut annertuumik kinguneqarsinnaasoq, suli siullermiigassanngortillugu oqaluuserisassanut ilanngunneqarsinnaavoq. Kim Kielsenip naalakkersuisoqatigiinni ikinnerussuteqartuni Demokraatinit Inatsisartuni taperserneqarlutik aalajangiutissappagu, naalakkersuinikkut imminut pisarinerussanersoq apeqqutaaginnarpoq.

Tassami Siumup aamma Demokraatit naalakkersuisoqatigiinnissamut isumaqatiginninniarneranni oqaluuserisat ilagisimagaat, Sermitsiaq.AG-p tusarpaa. Tassani isumaqatiginninniarnerni Demokraatit nalinginnaanngitsumik aalisarnermik inuussutissarsiortut soqutigisaat misissoqqissaarneqarlutik aamma aalisarnermut inatsisip nutaap saqqummiunneqannginnerani ilanngunneqarnissaat aalajangiusimasimavaat.

Siumumi perulluliorneq

Siumut aamma Demokraatit mittarfiliortiternissat pillugit isumaqatigiissinnaagunarput, illuatungeriit imminnut taama neriorsuuteqarnikuummata. Kisianni aalisarnermut inatsimmut tunngatillugu isumaqatigiissinnaanngillat. Aalisarnermullu inatsisitoqaq attanneqanngippat Siumumi perulluliortitsillunilu kamatsisinnaavoq – inuiaqatigiinnut qanoq aningaasartuutaatigissanera apeqqutaatinneqarani. Tassami Siumup iluani aamma inatsit isumaqatigiissutigineqanngimmat, suliaq suli erloqinarninngortinneqarpoq. Inatsillu pillugu iluminni akiuukkunnaarallarneqp ulorianartorsiortinneqannginniassammat, siunnersuutaasimasup allanngortinniarnissaanut annikillisippaa.

Aalisarnermut inatsit aamma taamaattumik akuersissuteqarnissamut ilungersuussineq, Kim Kielsenip uani sapaatip-akunnerata naanerani isumaliutersuuteqarnerani ilaanerat qularnanngilaq, ikinnerussuteqarluni naalakkersuisuunissanissaq, taamaattumillu inatsisit ataasiakkaarlugit amerlanerussuteqarnissamik ilungersuusserujussuaqqaartarnissaq, nammineq aamma ilaquttanilu kissaatiginerlugu nalilersorpaa.

Apeqqutit marluk

Demokraatit aalisarnermik nutaaqqinnaamik ilanngussiffiginiarpai, taamaalillunilu tunuliaqutini ammasumik isumaqatiginagit? Imaluunniit siunnersuutaasimasoq attatiinnarlugu aalisarnermut inatsisissamik piviusunngorsinnaarpasinngitsumik suliamik aallartitsiniarpa? Nunatsinni naalakkersuinermi ullumikkut apeqquterpassuarnit apeqqutit taakku marluupput.

Powered by Labrador CMS