aaqqissuusseqqinnerit

Kim Kielsenip aaqqissuusseqqinnissamut pilersaarutit oqaluttuarinianngilai

Naalakkersuisut siulittaaasuata naalakkersuisoqatigiit aaqqissuusseqqinnissat ukioq manna saqqummiussallugit naatsorsuutigisaat ilisimatitsissutigereernianngilai

Kim Kielsen, formandsvalg, Siumut

Aaqqissuusseqqinnissat pisariaqartinneqartut arriisaarunneqarpallaarput. Nunatsinni Aningaasaqarnermut Siunnersuisoqatigiit ukiumut nalunaarusiamini arlaleriarlutik ilaatigut oqaatigisareerpaat.

Naalakkersuisut siulittaasuata, Kim Kielsenip (S) maanna aaqqissuusseqqinnissat suliarineqalissanersut ilisimatitsissutigerusunngikkallarpaa.

Tamanna §37 naapertorlugu Randi Vestergaard Evaldsenip apeqquteqarneranut akissummi atuarneqarsinnaavoq.

Demokraatit siulittaasuata Naalakkersuisut aaqqissuusseqqinnissamut pilersaarutit suut 2017-imi Inatsisartunut saqqummiussaneraat paaserusuppaa.

- Isumaqarpunga § 37 naapertorlugu apeqquteqaammut Naalakkersuisut politikkianik aamma aaqqissuusseqqinnissanut inatsisillu allannguutissaannut nassuiaateqarluni akissuteqarnissaq inissaminiinngitsoq, Kim Kielsen (S) akissuteqarnermini allappoq.

Tamatumunnga taarsiullugut Randi Vestergaard Evaldsen (D) allallu soqutiginnissinnaasut siunnersuutit Inatsisartunut saqqummiunneqarnissaat utaqqeqqaartariaqarpaat.

- Naalakkersuisut aaqqissuusseqqinnissanut suliniutaat pilersaarutigineqartut, 2017-imi inatsisartunut saqqummiussassani Inatsisartut ataatsimiinnissaanni Inatsisartuni suliarineqartussatut Naalakkersuisut nalunaarutaanni inatsisissatut aalajangiiffigisassatullu siunnersuutigineqartut takuneqarsinnaassapput, Kim Kielsenip akissutaani aamma allaqqavoq.

Aaqqissuusseqqinnissalu ataatsimut pilersaarutigineqartut aamma Kim Kielsenip (S) oqaatigerusunngilai.

Atuaruk: Professori: Politikerit ajornartorsiutit saaminnut ajattorpaat

- Inatsisartut ataatsimiinnerani ataatsimoortillugu siunnersuutit suliarineqartussatut nalunaarutigineqartut saniatigut oqaatigisinnaavara, suliniutit aamma susassaqarfiit akimorlugit suliniutit ataatsimoortut saniatigut soorlu assersuutigalugu Naalakkersuisut aningaasanut inatsimmut siunnersuutaat aamma aningaasaqarnikkut ingerlatsineq pillugu nalunaarut kiisalu Naalakkersuisut Siulittaasuata Inatsisartut ukiakkut ataatsimiilernerannit ammaalluni oqalugiaataa akuttunngitsumik oq allisigineq artassapput, akissummi tamanna allaqqavoq.

Powered by Labrador CMS