Kim Kielsen: Atugarissaarneq pitsanngoriartortuassaaq

Siumup, Kim Kielsen siuttoralugu, siunissami sulisartoqarnermut politikkimi suut pingaarnerutinniarnerai ataani atuarneqarsinnaapput.

'Sulinermik tamassi sulisartut ulluanni tamassi pilluaritsi.

Siumumiit pingaartitatta ilagaat maj-ip aallaqqaataa, nunarsuaq tamakkerlugu sullisartut ulluat aamma maani nunatsinni nuannersumik ulloq sulisartut peqatigalugit nuannersumik nalliussisagarput, aammalu nunatsinni innuttaasut tamatta ullorsiortarfipput tassa ulluq manna 1979-simi Namminersornerulerneq eqqupparput tassa, ukiut 40-rut matuma siornatigut. Taamatullu 2009-imi Namminersorneq eqqupparput junip 21-viani inuiattut ullorsiornermi.

Innuttaaqatikka ullumikkullu Namminersornerulernermiit ukiunik 40-mgortorsiornitsinni tamassi pilluaritsi.

Ukiut 40-rut ingerlaneranni ila nunarput siuariarsimaqaaq, kingumut qivialaarutta ukiuni taakkunani sanaartugarpassuit ingerlanneqarsimapput meeqqerivinniit utoqqaat illuinut, atuarfinniik inuussutissarsiutitigut ilinniarfinnut ilisimatusarnermullu, tunitsiveqarfinniik aalisakkanik suliffissuarnut, oliamik nukissiorfinniik erngup nukissiorfinnut, qulimiguulinnut mittarfinniik timmisartorsuit mittarfiinut, kiisalu illupalaannguanik sanaartornermiik illorsuarnik quleriiaanik sanaartornermut, radiokut attaveqarnermiik mobiilikkut attaveqaateqalernermut.

Ila sorpassuit taajorsinnaagaluarpakka, kisianni pingaarnerpaavoq nunatsinni innuttaasut atugarisaasa pitsaanerulernissaannik anguniagaqarnerput, aammalu tamatumuunakkut pitsaanerulersitsisumik angusaqartarnissarput.

Aap, sorpassuartigut atugarissaarnerulersimavugut, kisianni suli suliassaqaqaagut.

Isumaqarpungalu ukiuni makkunani nunarsuarmi teknikkikkut siuariartornerujussuarmi Nunatsinniit akuulluartugut peqataallutalu, tamanna tulluusimaarutigisassavarput, inuit ikittunnguulluta nunarsuarmni sorpassuartigut malinnaalluta ingiaqataasinnaagatta.
Inuiaqatigiit tamatta atugarissaarnikkut ineriartoqqinnissarput salliutillugu ingerlaqqissalluta Siumumiit oqaatigereerparput, taamaattumik Siumumiit makku pingaartillugit suliarineqarnissaat anguniarpavut;

• Atuartitaanikkut Ilinniartitaanikkullu aaqqissuusseqqinneq suliarineqassaaq
• Inunnik isumaginninnikut sullissineq pitsanngorsarneqassaaq
• Peqqinnissakkut sullissineq pitsanngorsarneqassaaq
• Ineqarnikkut aaqqissuusseqqinneq suliarineqassaaq
• Aalisarnikkut suliffisuaqarnikkullu aaqqissuusseqqinneq ingerlanneqassaaq
• Saniatigooralugu aalisagartassaqartarnissaq siumup qulakkeersimaniarpaa
• Angallannikkut aaqqissuusseqqinneq ingerlanneqassaaq, mittarfissuit sanaartorneqassapput
• Sulisoqarneq pillugu inatsisitigut naleqqussaassaagut
• Akileraartarnikkut aaqqissuusseqqinneq ingerlanneqassaaq, aningaasarsiakinnernut akunnattumillu isertitalinnut iluaqusiissumik.
• Sulisartut utoqqalisut utoqqalinersiuteqarlutik suliinnarsinnaanissamut periarfissaat pitsanngorsarneqassapput.

Nunatsinni innuttaasut atugarisaasa pitsanngorsarnissaat pingaarnerpaatillugu Siumut ingerlaqqinniarpoq. Meeqqat, ilaqutariit meerartallit, utoqqaat, innarluutillit, napparsimasut siusinaartumillu pensionisiallit ilinniartullu atugarisaat pitsaanerulersinniarlugit aaqqissuusseqqinnerit Siumup sulissutiginiarpai.
Sulisartut, suleqataalluarnissinnut qujanarsuaq, suleqatigeeqqinnissarpullu qilanaaraarput.

Tamassinnut qujanaq, ullorsiornissinni tamassi pilluaritsi.

Kim Kielsen, Siumup siulittaasua'