Kim Kielsen: Assigiinngissuseq inissaqarpoq, Kalaallit Nunaannulli asanninneq katersuutsitsivoq

Inatsisartut suleqqilerput. Inatsisartut ullumimiit novemberip 21-at ilanngullugu pilersaarutit malillugit ulluni 30-ni ataatsimiissapput.

Oqaluuserisassatut ilanngunneqarsimasut katillugit 226-iupput, taakkunanngalu Naalakkersuisut inatsisissatut siunnersuutinik 24-nik, aalajangiiffigisassatut siunnersuutinik arfinilinnik nassuiaatinillu arfineq-marlunnik saqqummiussaqassallutik.

Siulittaasup oqalugiutaa

Ataatsimiinnerit ulluisa siullersaanni Naalakkersuisut siulittaasuata Kim Kielsenip (S) naalakkersuisuni inatsisartunilu ilaasortat oqalugiarfigai. Nunatsinni innuttaasut isorartuumi najugaqarnerat assigiinngisitaarnerallu Kim Kielsenip oqalugiutigaa, nunarpulli isorartugaluaqisoq nunatsinnut asanninneq assigiitsutut taallugu.

Oqaluuserisassat arlallit Naalakkersuisunit Inatsisartunut apuunneqassapput.

Siulittaasup siullertut uku taavai:

• Meeqqat inuusuttullu angajoqqaaminnit sumiginnagaasut ikilisinniarlugit nuna tamakkerlugu iliuusissatut pilersaarut
• Utoqqalinersiaqarneq pillugu inatsisip allanngortinnissaa
• Ilinniartut ineqarfii pillugit inatsit
• Ilanngaassivik
• Piniarnermut aallaaniarnermullu inatsisissaq

Meeqqat ukiuat

Naalakkersuisut siulittaasuata ukioq manna meeqqat ukiuattut taavaa. Meeqqalli ukiuat oqaluuseritillugu paatsoorneqartarluni oqalugiarnermini oqarpoq.

- Uani meeqqat ukiuannik oqaraangama meeqqatta illersorneqarnerunissaannik isumaqartittarpara. Meeqqat toqqissillutik perornissaannut akisussaasut annerpaat tassaapput angajoqaat, oqalugiummini erseqqissaavoq.

Suliassat annertuut

Suliassani annerusut ilagaat tassa aalisarnermut inatsit naammassineqartussaq, ilaqutariinnut politikki saqqummiunneqartussaq akuerineqartussarlu, meeqqat inuusuttullu sumiginnarneqartut pillugit nuna tamakkerlugu iliuusissatut pilersaarut allarpassuillu.

Naalakkersuisut siulittaasuata oqalugiutaa tamakkerlugu uani atuarsinnaavat.