Kim Kielsen uummatimigut suliaritissaaq
Kim Kielsen uummallunnini pissutigalugu ukiap ingerlanerani suliaritissaaq.
Ukiut marlunngulersut matuma siorna, tassa 3. oktober 2017 Naalakkersuisut siulittaasuat, Kim Kielsen (S) folketingip ammarneqarneranut atatillugu Christiansborgimi najuunnermini inuummarliulerpoq. Taamani ambulancemik aaneqartariaqalerluni rigshospitaliliaanneqarpoq.
Maanna paasinarsisimalerpoq Kielsen uummammini akornuteqartoq taamaammallu ukiaru kingusinnerusukkut uummammigut suliarititittussanngorpoq. Suliaritinnissata tungaanut nakorsat siunnersorsimavaat eqqissisimaarluinnaqqullugu, suliaritinnissaa sioqqullugu siunertarineqartutut nakorsaatit iisartakkat sunniuteqarluarniassammata, suliaritinnissaanummi iisartakkat naatsorsuutigineqartutut sunniuttariaqarmata.
Nakorsat siunnersutaat Kielsen-ip tusaassallugu toqqarpaa, taamaammallu maannamiit ullut 14-it sulinngikkallarniarpoq. Tamannalumi pisariaqartilersimavaa nakorsaatit sakkortuut timimullu nukillaangatitsisut suliaritinnissani sioqqullugu iioraramigit.
- Pisuutinneqartarpunga uninngaannartutut, taamaattorli ukiut arlalissuit feriarnikuunngilanga, tamanna artorsaatiginngilara, tassami pisussaaffeqarpunga inuiaqatigiinnik politikkikkut aqutsinermi siuttutut sulinissannut, pisussaaffillu taanna qimarratiginavianngilara. Taamaattorli nakorsat siunnersuutaat malittariaqalerpara. Tamatuma malitsigisaanik Naalakkersuisut ilisimatippakka maannamiit ullut 14-it eqqissisimaarnissara siunertaralugu sulinngikkallassallunga, piffissami tassani ineqarnermut attaveqaqatigiinnermullu Naalakkersuisoq, Karl Frederik Danielsen sinnerlunga Naalakkersuisut ataatsimiittarnerinik aqutsisassaaq, siger formanden for Naalakkersuisut, Kim Kielsen (S) Sermitsiaq.AG-mut oqarpoq.