Skip to main content

Kim Kielsen siulittaasussatut qinigassanngortilluni sassaqqinniartoq

Kim Kielsen Siumumi siulittaasussatut sassaqqinniarluni eqqarsaateqartoq, Sermitsiaq.AG-mit paasineqarpoq

Siorna septembarip qaammataani Siumumi eqqissiviilliortoqarmat Kim Kielsen nalunaarpoq, ukioq manna aasaanerani Siumut nuna tamakkerlugu ataatsimeersualerpat Siumut siulittaasuattut tunuarniarluni.

Maannali allatut eqqarsalersimannguatsiarpoq, juulillu arfineq-pingajuanniit qulinganut nuna tamakkerlugu Ilulissani ataatsimeersuartoqalerpat siulittaasussatut sassaqqinniarluni eqqarsaateqalersimavoq. Sermitsiaq.AG-p Siumut siulittaasuata qanigisaannit tamanna  tusarsimavaa.

Kim Kielsen sivisuumik eqqarsaasersorsimagami naatsorsuutigaa, aalajangernini qanittukkut tamanut nalunaarutigissallugu.

Erik Jensen novembarip qaammataani naalakkersuisutut tunuartoq peqatigitillugulu Siumumi siulittaasunngorniarniarluni nalunaaruteqartoq, maannamut kisiartaalluni pisortatigoortumik qineqqusaassamaarsimagaluarpoq.

- Unneqarissumik suliaqarsimavunga, Naalakkersuisutulli atuunninni iluarinngisakka aamma akuerisariaqartarsimavakka, Erik ilisimatitsivoq. Kim Kielsenilli suliai ingerlatseriaasialu naammaginartissimanngilluinnarpai. Naamerluinnaq, taamanikkut taamak oqarpoq.

Erik Jensenilli siulittaasutut qinigassanngortinniarnera Kim Kielsenip siulittaasutut atuuteqqinnissamut piareeqqalluni nalunaaruteqarneranut pingaarnerit pissutaasut ilaginnguatsiarpaat. Kielsenimmi isai malillugit Erik Jensen nunami partiit annersaannik aqutsinissamut naleqqutinngilaq, taamalu aamma nunamik aqutsinissamut naleqqunnani. Kim Kielsenip Erik nunamut tamarmut tunngatillugu politikkeritut isiginagu Sisimiuni najukkami politikkeritut isigivaa. Taakkua saniatigut isumaqannguatsiarpoq, Erik Jensen ukiuni pingasungajaannarni nunamut tamarmut politikkeriusimagami politikkikkut misilittagaqanngitsoq.

Ilanngullugu puigorneqassanngilaq, Erik Jensen Siumumi ilaasortat nuimasut afineq-marluk ukiassaq Kim Kielsenimik uppititseriaagaluartut ilagimmassuk. Pisoq soorunami pineqartup puigorsimanngisaa.

Kielsen taamanikkut Siumut najukkani immikkoortortaqarfiinit tapersersorluarneqarpoq, taamalu pikitsitsisut unitsinneqarlutik. Siumumi siulittaasoq tapersersorluarneqarami eqqarsalersimannguatsiarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER