Kim Kielsen: Partii ajortuliorsimanngilaq

Talllimanngornerup unnuaani qinersinerup inernera paasinarsereersoq partiit siulittaasui qasoqqasut KNR-TV-kut pisarnertut naggattaajusumik apersorneqarput.

Siumup siulittaasuata tulluusimaartup Kim Kielsenip, ataasinngorpat naalakkersuisooqatigiinnissamik isumaqatigiinniarnissat sioqqullugit, naggataajusumik oqallinneq ammarpaa.

– Aap kikkut tamarmik siulittuutigisimavaat Siumut ajorsassasoq. Immikkut ilisimasallit, tusagassiorfiit illua'tungiliuttullu isumaqarsimapput Siumut ajorsarujussuassasoq. Siumulli ajugaavoq, ajugaavugut, siulittaasoq isumaqatigiinniarnissanik aqutsisussaq ajorpoq.

– Sinerissami qinersisartut oqalorerput. Nalunngilluarpaat inuit ataasiakkaat ajortuliorsimasut, partiiunngitsoq, Kim Kielsen oqarpoq.

– Qinersiartunit tapersersorneqarnerujussuarput tatigineqarnerpullu qujamasuutigeqaara, pissaanerlu maniguullunga tigussavara mianersortumillu atussallugu, Kim Kielsen oqarpoq.

Qinersinermi taaguunneqarnerpaaq

Inuit Ataqatigiit siulittaasuata Sara Olsvigip erseqqissarpaa nunap atugarisa pitsanngorsarniarlugit siammasissumik suleqatigiinnissaq Inuit Ataqatigiit neriuutigigaat.

– Siullermik Kim Kielsenimut oqaqqaassaanga, ajugaaninni pilluarit. Inuitd Ataqatigiit arnanik nukittuunik Inatsisartunut ilaasortaatitaqalerput, Sara Olsvig oqarpoq.

– Aamma erseqqissarusuuppara pisinnaatitaaffiga atorusukkakku nunap atugarliornerata iluarsiniarnissaanut siammasissumik suleqatigiinnissamut, Inuit Ataqatigiit siulittaasuat oqarpoq.

Uummatini naalaarlugu

Partii Naleqqap siulittaasua Hans Enoksen oqarpoq suleqatigiinnissamut partiinut tamanut ammalluni.

– Killilersugaanani oqaaseqarsinnaatitaaneq qaqugumulluunniit illersorneqassaaq, tamannalu uummammik pisumik neriorsuutigisavara. Uummammit pisut naalaarniarneqartassapput. Suleqatigiinnissamut ammavugut, Hans Enoksen oqarpoq, unnullu taanna siusinnerusukkut partiip katerisimaarfianut Kim Kielsenimit pulaarneqarpoq.

Demokaatit siulittaasuata Anda Uldumip nuannaarutigaa 2013-iim Inatsisartunut qinersinermut sanilliullugu Inatsisartuni ilaasortaatitatik marloriaatinngormata, marlunniit sisamanngorlutik.

– Nalunaajaatitsinnik saqqummiussillaaqqissimavugut, partiip ilaasortaatitaasa marloriaatinngornerat pillugu Uldum oqarpoq.

– PIssaaqarnerli pingaarnerutinnianngilarput. Maanna sulilissaagut - illua'tungiliuttutut imaluunniit Kalaallit Nunaannik pitsaanerusumut ingerlalersussamik aqutseqataasutut, Demokraatit siulittaasuat oqarpoq.

Atassut aamma siammasissumik suleqataarusuppoq.

– Nalakkersuisooqatigiinnudt siammasissumik suleqatigiissunut suleqataarusuppugut, Atassutip siulittaasua Knud Kristiansen oqarpoq.

Partii Inuit isertitaqaqqinngitsoorput. Siulittaasup Nikku Olsenip qinersisutik qutsavigai, partiillu tulliani ataatsimeersuarnissaani partiip oqaatsinut politikkia isumaliutigeqqinniarlugu oqarpoq..