oqalinneq

Kim Kielsen Odensemi akilluartaarpoq

Naalakkersuisut siulittaasuata Kim Kielsenip (S) Danmarkimi oqallitsitsigami nungusaataanngitsumik aalisarneq meeqqallu sammineqarnerulernissaannik kissaatigisani eqqartorpai

Naalakkersuisut siulittaasuat marlunngormat Odensemi fynimiunit kalaallinillu soqutiginnittunit apeqqarissaarfigineqarpoq

Sermitsiaq.AG-p tusagassiortua naapertorlugu Kim Kielsen (S) oqallorissaaqaaq, marlunngormat ualikkut Odensemi Det Nordatlantiske Husimi tamanut ammasumik ataatsimiititsigami.

Apeqqarissaarfigineqarpoq

Danmarkimut Savalimmiunullu angalanerminut atatillugu Kim Kielsen isumaqatigiissuteqarsimavoq tassunga aggerniarluni Kalaallillu Nunaata unammilligassai periarfissaalu assigiinngitsut oqaluuseralugit.

Soqutiginnittorpassuit ataatsimiinnermut takkussimasut oqaatigineqareersutut Kim Kielsen piumassuseqarluartoq naapippaat, taannalu aallarnisaataasumik Kalaallit Nunaanni politikkikkut anguniakkanik sulinermik saqqummiussereersoq peqataasunit ´sunik tamanik´ apeqqarissaarfigineqarpoq.

Aperiumasorpassuaqarporlu. Ataatsimiinneq akunnerit marluk qaangiuttut naammat oqaaseqartussatut allatsissimasut arlallit apeqquteqanngitsoorput.

Ukiortaami oqalugiaat aallaavigalugu

Kim Kielsenip saqqummiussinermini ukiortaami oqalugiaanni aallaavigaa.

Paasissutissiissutigai Kalaallit Nunaanni politikkikkut pissutsit, naalakkersuisoqatigiinni sulineq, aningaasaqarniarneq ajornakusoortoq, aalisagartassiissutit, ilinniagaqarnermi pissutsit, suliffissaaleqineq, sanaartugassat angisuut, selskabini namminersorlutik oqartussani inuttaqarneq, aatsitassat soorunamilu aamma takornariaqarneq sammivai.

Immikkoortut pingaarnerit ataasiakkaat

Naalakkersuisut siulittaasuat qanoq iliortoqarnissaanik takkartugarpassuaqarpoq. Ilaatigut:

– Ineriartornermi nuna tamaat peqataatissavarput. Taamaasiunngikkutta eqititerineq pinngitsoorani sakkortusissaaq, Kim Kielsen oqarpoq.

– Sulifissaaleqinerujussuaq iliuuseqarfigissavarput. Suliffissarsiuussisarfik nutaaq isumalluarfigisorujussuuvara. Tamatumunnga atatillugu selskabit namminersorlutik oqartussanit pigineqartut iliuuseqarnissamut pilersaarusiussapput, sulisut nunaqavissut amerlisarniassagatsigit.

Nungusaannginnissaq taasaqattaarpaa

Aalisakkat tunisassiarisartakkavut atorluarnerussavagut. Oqaaseq nungusaataanngitsumik Kim Kielsenip arlaleriarluni atortarpaa, aalisakkanik pisassiissutit eqqortorneranni.

– Takornariaqarneq annertusarneqassaaq Periarfissarpassuaqarpoq, taanna oqarpoq.

– Amerligaluttuinnartut ilinniagaqartaleraluartut naammanngilluinnarput. Amerlanerusut assigiinngitsunik ilinniagaqassapput.

Meeqqat sammillugit

Kim Kielsenip arlaleriarluni naqissusertarpaa aalisarneq, aatsitassat, takornariaqarneq suliffissaaleqinerlu pingaaruteqaraluartut, meeqqat tamanit pingaarnersaasut.

– Sumiiffinni assigiinngitsuni pisartut akuersaarsinnaanngilagut. Pissusilersornikkut allannguisoqassaaq. Pissusilersornikkut allanngortitsinerit aningaasanik akeqartariaqanngillat. Ima erloqinartigaaq, sumiifiit ilaanni pisartut ajorluinnartut akuerinngisaannassallutigit.

Kim Kielsenip assersuutissat marluk taavai:

– Takusimavarput meeqqat 12 inorlugit ukiullit nappaatipilunnik tunillanneqarsimasut. Misigisarsimavarput meeqqanik imminut toquttoqartoq.

Aperiumasorpassuit

Naalakkersuisut siulittaasuat apeqquterpassuarnik apeqquteqarfigineqarpoq. Apeqqutit angisuut mikisullu.

Assersuutigalugu apeqqutigineqarpoq kalaallinut Danmarkimiittunut puisip neqaanik pisisinnaaneq ajornannginnerulersinneqarsinnaannginnersoq. Aamma soorunami namminersulivinnissamik apeqqut.

Kingullermut Kim Kielsen akivoq:

– Kalaallit qaqugu namminersulivinnissaat ukiulerusunngilara. Allarpassuit taamaasiortarput. Tamanna qaqugu siunissami aalajangerneqartussaavoq.

Akunnerit marluk

Akunnerit marluk ataatsimeereernermi Kim Kielsen pissusissamisoortumik ersaartaanneqarpoq. Takkuttorpassuit akunnerit marluk naalakkersuisut siulittaasuat nuannisaqatigaat.

Powered by Labrador CMS