Skip to main content

Kim Kielsen nunat tamalaat isumasioqatigiinnissaasa ornigarluarneqarnerannut pissutaasoq

Donald Trumpip Kalaallit Nunaannik pisinissamut piareeqqalluni oqarnerata kingorna Kalaallit Nunaat aatsaat taamak nunanit tamalaanit soqutigineqartigaaq. Attaveqaatit isumasioqatigiiffianni Artic Circle Assemblymi Naalakkersuisut Siulittaasuata Kim Kielsenip ammaanersiorluni oqalugiarfissaani tamanna takuneqarsinnaavoq.

Arctic Circle Assembly sisamanngorpat Reykjavikimi aallartinneqassaaq, tassungalu atatillugu Kim Kielsenilu Issittoq pillugu nunat tamalaat oqaluuserisaqarnissaannut atatillugu aaqqissuisunit siuttussatut immikkut ittumik soqutigineqarluarpoq.

Arctic Circle Assemblymi ukioq manna suliassatut pilersaarutivut nuannaarutigeqaakka, pilersaarutitsinni Kalaallit Nunaanni aningaasaliissuteqarsinnaaneq Kalaallillu Nunaannik suleqateqarsinnaaneq immikkut ukkatarisimavarput.  Ammaanersiorluni ataatsimut katersuunnermi nunatta aningaasaqarnikkut siuariartortittuarneqarneranut tapersiissutissatut suliniutivut ilisimatitsissutigissavavut, Nunanut Allanut Naalakkersuisoq Ane Lone Bagger Sermitsiaq.AG-mut ilisimatitsivoq.

Kalaallit Nunaannit peqataasorpassuit

- Isumasioqatigiinnermi politikkerit ilisimatuullu aamma minnerunngitsumik nunani arlalinni inuussutissarsiuteqartut peqataassapput, taamaammat aningaasaliissutissat suleqatigiinnissarlu ukkatarineqarnissaat naapertuuppoq, Ane Lone Bagger erseqqissaavoq.

Namminersorlutik Oqartussat ataatsimut katersuunnissamut aaqqissuisuupput, qulequtaralugu: "Greenland - Open for Business", taannalu ammaanersiorluni oqalugiartoqareerpat aallartinneqassaaq, tamatuma takutippaa, ukiuni makkunani isumannaallisaanermut silallu pissusaanut tunngatillugit pissaaneqarniunnermi Kalaallit Nunaata qitiusumik inissisimaneranik aaqqissuisut takunnilersimanerat.

Ataatsimut katersuunneq

- Ataatsimut katersuunnitsinni peqatigissakka tassaapput, oqalugiartussat Karsten Høy Greenland Holdingimeersoq aamma Verner Hammeken Royal Artic Linemeersoq, Inga Dora Markussen nutserisuussaaq, naalakkersuisoq oqaluttuarpoq.

Tamakkua saniatigut allanik suliassaqarpoq, soorlu Visit Greenland  Promote Icelandilu peqatigalugit takornariartitsisarneq imminut napatittoq pillugu ilisimasanik avitseqatiinnissaq, kiisalu ilaatigut USA-mik Islandimillu suleqateqarluarnermik erseqqissaassuteqarniarluni ataatsimeeqatigiinnerit ilassinninnerillu arlallit ingerlanneqassallutik.

Isumasioqatigiinnissaq sioqqullugu pisussat

Arctic Circlep aallartinneqannginnerani Akureyri kommune suleqatigalugu "From National Strategies to Shared Solutions" ingerlanneqassaaq, aamma Islandimi Minister for Turisme, Erhverv og Innovation, Þórdís Kolbrún Reykfjörð Gylfadóttir, nunami periusissiat najukkani qanoq atuutsinneqalersinnaannerat pillugu oqallinnermut peqataassaaq.

- Tamasa ataatsimut isigalugit, sapaatip akunnerani suliassatsinnut soqutiginartorpassuarnut peqataanissara qilanaareqaara, Naalakkersuisoq Ane Lone Bagger oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER