Kim Kielsen nittartakkakkut sioorasaaraa
Angut Nuummeersoq Naalakkersuisut siulittaasuannik facebook aqqutigalugu sioorasaarisimasutut unnerluutigineqarluni tigummigallarneqarpoq. Politiit pisoq ilungersunarluinnartutut isigigaat, unnerluussisut pisortaat oqarpoq.
Eqqartuussisoqarfik Sermersooq sapaammi aalajangerpoq, angut Nuummeersoq Naalakkersuisut siulittaasuannut Kim Kielsenimut (S) sioorasaarisimasutut ulluni 25-ni tigummigallagassanngortinneqassasoq.
Aviisi AG taama allappoq.
Tigummigallagassanngortinneqartoq taamaaliornermini siullermiilinngilaq.
Angut paragraf taannarpiaq malillugu siusinnerusukkut pineqaatissinneqareersimavoq pillaammik atuisussatut pineqaatissinneqarsimalluni, politimestereqarfimmi unnerluussisut pisortaat Morten Nielsen AG-mut paasissutissiivoq.
Taanna nangilluni oqarpoq, unnerluussisussaatitaasut angutip qanoq pineqaatissinneqarnissaanik qanoq piumasaqarnissaminnik suli inaarutaasumik isummersimanngitsut. Unnerluussisulli suliani taama ittuni piumasaqaataa tamatigut tassaasartoq pinngitsoornani pineqaatissinneqarsimasunut inissiisarfimmiittussanngortitsinissaq, Morten Nielsen oqarpoq.
Angut tigummigallarneqartoq Kim Kielsenip tungaanit politikkimut tunngasunik kamaatiginnissimagunarpoq. Unnerluussisut pisortaata sioorasaarut tigussaasoq angutip saqqummiussimasamisut unnerluunneqatigisaa paasissutissiissutigerusunngilaa, oqarlunili, sioorasaarineq nittartakkami allaaserisamut oqaaseqaatini atuarneqarsinnaasimasoq.
Aviisimi AG-mi atuarnerusinnaavutit. Aviisi uani pissarsiariuk: