Kim Kielsen ingerlaqqippoq: Isornartorsiuineq pillugu ilaasortat tusarniarneqassapput
Siumumi siulittaasoq taamatullu Naalakkersuisut Siulittaasuat, Kim Kielsen (S) siulittaasutut ingerlaannassaaq. Allakkiarli Siumumi ilaasortanit nuimasunit nassiunneqarsimasoq immikkoortortanut tusarniutigalugu nassiunneqassaaq.
Ullormut arlaleriarluni ataatsimeeqateqartareerluni, Siumumi siulittaasup tusagassiortut aggersimasut oqaluttuuppai partiimi taamatullu Naalakkersuisuni Siulittaasutut ingerlaannassalluni.
Siumut sinnerlugu Inatsisartuni ilaasortat nuimasut arfinillit Naalakkersuisorlu ataaseq ataasinngornermi unnukkut ataatsimoorussamik tusagassiutinut nalunaaruteqarput erseqqissarlugu siulittaasortik maanna tatigiunnaasimallugu. Taama nalunaaruteqartoqarnerup kingunerisaanik Siumumi ulluinnarni aqutsisut, siulersuisuunerit Siumullu Inatsisartuni gruppiani ataatsimiittoqarpoq.
- Suli isumaqatigiinngilagut. Siumumi isumaqatigiinngittoqartarpoq, tamanna pikkoriffigivarput. Isumaqatigiippugulli allakkiat nassiunneqarsimasut immikkoortortaqarfinnut tusarniutigalugit ingerlateqqinneqassasut. Taamaasiorutta partiip malittarisassai malinneqassammata, Kim Kielsen ilisimatitsivoq.
Tatiginninnginneq
Siumup ilaasortai arfineq-marluk ippassaq unnukkut tusagassiutinut nalunaaruteqarput, piumasaralugu Kim Kielsen partiip siulittaasuattut tunuassasoq. Tunngavilersuutit ilagaat siulittaasup qineqqusaarnerup nalaani neriorsuutit naammassisimanngimmagit.
- Tamanna eqqunngilaq. Siumumi ataatsimoorluta anguniagaqarpugut, aalisarnermiuppat, angallannermiuppat, innarluutillit pineqarpata isumaginninnerluunniit pineqarpat. Siumut siulittaasuattut pisussaaffeqarpunga taakku sulissutigissallugit anguniassallugillu. Anguniagaqarpugut ataatsimeersuarnerup tungaanut sulissutigisatsinnik, naalakkersuisoqatiginnilu isumaqatigiissuterput malillugu aamma sulivugut, Kim Kielsen oqarpoq.
Tusarniaaneq
Kim Kielsen ilisimatitsivoq Siumumi ilaasortat nuimanerit arfineq-marluk allakkiaat immikkoortortaqarfinnut tusarniutigalugu nassiunneqassasoq. Immikkoortortaqarfiit tamakkerlutik isornartorsiutigineqartut naliliiffigissavaat akissutillu siulersuisuunernut allaganngorlugit nassiutissallugit.
Taassumalli ilisimatitsissutigisinnaanngilaa immikkoortortaqarfiit akissutaat qaqugu tiguneqarumaarnersut.
- Atagu allakkiaq immikkoortortaqarfinnut nassiuteqqaartigu, tusarlugulu qanoq akinersut. Siulittaasutut ingerlaqqinnissamut piareersimavunga, allatulli aamma pisoqassappat aamma piareersimavunga, oqarpoq.