Kim Kielsen Inatsisartut ataatsimiinnissaannut aggersaavoq
Nunatsinni coronavirusimut tunngatillugu pissutsit pissutigalugit, nukinginnartumik inatsisiliornissaq qulakkeerneqarsinnaaqqullugu Inatsisartut immikkut ittumik ataatsimiittussanngorput.
COVI19 pillugu pissutsinut atatillugu nukinginnartumik inatsisiliornissaq qulakkeerneqarsinnaaqqullugu Inatsisartut immikkut ittumik ataatsimiigiaqquneqarnissaannik Naalakkersuisut siulittaasuata qinnuteqaataanik Siulittaasoqarfik tigusaqarpoq.
Suliaq Siulittaasoqarfimmit pingasunngornermi suliarineqarpoq Inatsisartullu immikkut ittumik ataatsimiigiaqquneqarnissaannik qinnuteqaat akuerineqarluni, tusagassiutinut nalunaarummi pingasunngornermi nassiunneqartumi allassimavoq.
Inatsisartut siulittaasuat, Vivian Motzfeldt sapaatip akunnerata siuliani ilisimatitsigaluarpoq, Inatsisartut upernaakkut ataatsimiinnissaat aprilip 17-ani ammarneqartussatut pilersaarutigineqaraluartoq, qaammammik ataatsimik kinguartinneqartoq.
Inatsisartut aalajangiisinnaassuseqartut ikinnerpaamik 16-iusussaapput, taakkulu qanoq katersorneqarsinnaanersut suli ilisimaneqanngitsoq, tusagassiutinut nalunaarutigineqarpoq.
Allaanerussaaq
Coronavirus pissutigalugu pissutsit killeqarnerunerannut naapertuuttumik ataatsimiinnissaq qanoq ingerlassanersoq pillugu ersarissunik killiliisoqarnissaa sulissutigineqarpoq.
Taassuma saniatigut inatsisartut aalajangiisinnaassuseqartut 16-it ataatsimiittarfimmi ataatsimoortinneqarsinnaanissaat pisariaqarpoq.
Massakkorpiaq ilaasortat Nuummiittut16-iunngillat. Ataatsimiittarfimmi ilaasortat 16-iusinnaanissaat qanoq qulakkeerneqarneqarsinnaanersoq misissorneqarpoq.
- Sineriammiilli timmisartukkut aggertitsisoqassanngilaq, taamaattumillu allatut aaqqiisoqartariaqarluni, ilisimatitsissutigineqarpoq.
Isertoqaqqusaanngilaq
Pissutsit sukannersut Nuummiittunut tamanut atuuttut aammalu Inatsisartunit allaffissornermillu suliaqartunit maleqquneqartut malillugit ataatsimiinneq ingerlanneqassaaq, taamaalillunilu pisariaqanngitsumik tunillatsittoqannginnissaa qulakkeerneqassalluni.
Immikkorluinnaq ittumik Inatsisartut ataatsimiinnissaanni pissutsit tamarmiusut paasinarseriarpata immikkut ittumik ataatsimiinnissamut ulluliussassaq Siulittaasoqarfimmit ulluni qaninnerni paasissutissiissutigineqassaaq. Immikkulli ittumik ataatsimiinnissamut sapinngisamik piaarnerpaamik aggersaanissaq anguniarneqarpoq.
Naatsorsuutigineqartariaqarpoq ataatsimiittarfimmut isernissamut piumasaqaatit sakkortoorujussuunissaat. Soqutiginnittunit internetikkut tv-kkulluunniit taamaallaat isiginnaarlutik malinnaasoqarsinnaanissaat aallaaviussaaq.