siulittaasussarsiorneq
Kim Kielsen-imik tapersersuineq
Kim Kielsen qaammatip uuma naanerani siulittaasussarsiornissami ajugaalluavinnissaa Jørgen Wæver Johansen-ip naatsorsuutigaa.
Siulittaasussarsiornissami Kim Kielsen tapersersorlugu suli amerliartuinnartut avammut ammasumik nalunaarutigisalerpaat, siulittaasussarsiornissaq Siumup nuna tamakkerlugu ataatsimeersuarnissaani junip 26.-ianiit junip 28.-ianut ingerlanneqartussami pissaaq.
Siullermik immikkoortortaqarfik Sisimiuniittoq Kim Kielsen taperserlugu suaaruteqarpoq. Siulersuisut nutaat ikkunneqareernerata kinguninngua tamanna pivoq.
- Partiimi Vittus avissaartutsiniarsarivoq. Naalakkersuisut isumasioqqaarnagillu inuttut namminersuutigalugu FN-imut saaffiiginnimmat aamma tatigisinnaanngilara. Aningaasaqarnerput qummut aallariartorpoq, suliffissaaleqineq appariartorpoq aalisarnerlu ingerlalluarluni, sooq taava allannguissaagut Vittus-i pissaanermik tigusaqarusunnerinnaa pillugu? Immikkoortortaqarfimmit aallartitat aappaa Dorthea Isaksen Sermitsiamut oqarpoq.
Kim Kielsen aamma Upernavimmit tapersersorneqarpoq.
- Kim-ip partii ataatsimoorfiulersippaa. Siammasissumik suleqatiginninneq pilersissinnaallugu aamma takutippaa. Naalakkersuisooqatigiinnilu suleqatiginninneq aqqutissiuussinnaallugu aamma takutippaa. Qinersisartullu amerlanerpaat sinnerlugit sullissisussanik Naalakkersuisooqatigiinnik taamaasillunittaaq pilersitsivoq, Gunnar Lennert Upernavimmit aallartitaq oqarpoq.
Aammattaaq maanna partiip siulittaasutut tullersortaa, Jørgen Wæver Johansen, Kim Kielsen-imik ersarilluartumik tapersersuinini avammut nalunaarutigaa.
Aviisimut ilanngutassiami takkajaami Kim Kielsen politikkikkut takussutissat angusarisai pillugit nersorpaa ilaatigut ineriartortitsinerit qaffassarneqarneri, suliffissaaleqinerup appartinneri, mittarfittaassaliornerit, naligiinnerulersitsineq aammalu tunngaviusumik inatsisiliornissami isumalioqatigiisitaq.
Inuit Ataqatigiinnik Partii Naleqqamillu siamasissumik naalakkersuisooqatigiilernerit aammattaaq Kim Kielsen-ip suleqatiginnissinnaassusianik katersuuffeqarnermillu pilersitsineranik takussutissatut tigussaasutut isigai
- Amerlaqaagut ukiorpassuarni taamatut katersuuffiusumik naalakkersuinikkut ingerlatsisoqartariaqarneranik kissaateqartarsimasut, aammalu kateriffiusunik nuna tamakkerlugu naapeqatigiiffiusunik aaqqissuusseqqinnernillu kissaateqarsimasut, tamatsinnut aammalu siunissamut aalajaannerusumik nunatut siunissaqarnissarput siunnerfigalugu suleqatigiittoqarnissaanik kaammattuisarsimasut, Jørgen Wæver Johansen allappoq.
Ilanngutassiami unammillertoq Vittus Qujaukitsoq eqqaanngivissorpaa. Kim Kielsen-illi siulittaasutut sulilluarneranik nersualaarinnilluni.
- Tassunga atatillugu Kim Kielsen Naalakkersuisut siulittaasuatut partii Siumumilu siulittaasutut ilisarnaatigilluarpai tamatta siuariartornermik misigisaqaratta, kateriffeqaratta takussutissalimmillu inerisaasoqarnera misinnarmat.
Jørgen Wæver Johansen suli ilassusiivoq. Kim Kielsen-ip ajugaalluavinnissaa eqqoriarpaa.
- Siulittaasussarsiornermi tusagassiutitigut pissanganartorsiungaartoqarnissaanik ilimasaarinerit eqquuppallaarunnanngillat. Kim Kielsen nukittuumik inissisimalluarpoq.
Tassunga atatillugu ukioq 2014-imi siulittaasussarsiornermi Kim Kielsen taasisinnaasunit 65-iusunit taasisut akornani 44-nit taaguunneqarluarnera innersuussutigaa, illua tungaani Lars Emil Johansen 17-iinnarnik taaguunneqartoq.
Nuna tamakkerlugu ataatsimeersuarnissami aallartitat 69-iussapput kinalu siulittaasunngussanersoq aalajangissavaat.