Skip to main content

Kim Kielsen: Ajornerulertoqarnissaanik aarlerisaarinikuuvugut

Kiffartuussinissamut isumaqatigiissutit aningaasartaasa amerlassusaasa killilerneqarneri ajornerulersitsinissamik kinguneqarnissaa, Naalakkersuisut aarlerisaarutigisimavaat. Maanna aningaasanik amerlanernik nassaarnialerpoq

Angallassinermi kiffartuussinermik ajornerulertoqarnissaa Inatsisartuni politikerinut tupaallaataasussaanngikkaluarput. Naalakkersuisut siulittaasuat, Kim Kielsen (S) taama isumaqarpoq.

Tassami aningaasaqarnermut ataatsimiititaliap nammineerluni, apriilip qaammataani aningaasat 121 millionit koruuninut killilerpaa.

Atuaruk: Kommune Kujalliup kiffartuussinissamut isumaqatigiissut dumpertippaa

- Aningaasat amerlassusaat naliliinerput malillugu ajornerulersitsissasut, tamatuma kingorna aarlerisaarutigaarput, Kim Kielsen (S) oqarpoq.

- Taamaakkaluartoq aningaasaqarnermut ataatsimiititaliap killigititaq atuutsiinnarpaa.

Atuaruk: IA: Kiffartuussinissamut isumaqatigiissutini innuttaasut ilanngunneqarlik

IA-p aarlerisaarut ilisarisinnaanngikkaa
Aningaasaqarnermut ataatsimiititaliamulli ilaasortap Aqqaluaq B. Egedep (IA) KNR-imut oqaatigaa, ajornerulertoqarnissaanik aarlerisaarneqarsimanani.

- Naalakkersuisut taamanikkut siunnersuuteqarput aningaasaliissutit appartinneqassasut, taavalu aningaasanut inatsimmi siuliini oqaaseqaammi kiffartuussinerup ajorseriannginnissaa oqaatigineqarpoq,  aningaasaliissutigineqartut ikileriartinneqartussaagaluartut,  taannaavorli Inatsisartuni aalajangiinermi tunngavilersuutigineqartoq, Aqqaluaq B. Egede KNR-imut taama oqarpoq.

Atuaruk: Kim: – Angallassinerup ajorseriarnissaa siunertarinngilarput

Allakkatigulli attaveqaqatigiinnerup Kim Kielsen ilumoortoq paasinarsitippaa.

- Aningaasaqarnermut sinaakkusiussat allanngortinneqassanngippata aammalu ilaasut  nammineerlutik  akiligassaat qaffatsineqassanngippata, Namminersorlutik Oqartussat pitsaassutsimik ilorrisimaarnassutsimik imaluunniit tunngavissnik inuiaqatigiinnut pingaartulinnik allanik appaasariaqalersinnaapput, Knud Kristiansen (A) ataatsimiititaliamut maajip ulluisa arfernganni allappoq.

Aningaasanik amerlanerusunik nassaarniartoq
Kiffartuussinissamut isumaqatigiissutit pitsanngoriartinniarlugit, Kim Kielsen aningaasanik amerlanerusumik nassaarniarluni piareerpoq.

- Tamanna ingerlatseqatigiiffinnik ilassutilerlugu isumaqatigiissusiornikkut pisinnaavoq, Kim Kielsen oqarpoq.

Tamannali ajornartorsiuteqanngitsoortinngilaq. Tassami ingerlatseqatigiiffiit allat kiffartuussinissamut isumaqatigiissutinik neqerooruteqaraluartut, Naalakkersuisunut maalaaruteqaratarsinnaapput. Taakku suliarinnittussarsiornermut allamik neqerooruteqarsimasinnaagaluarlutik oqaatigisinnaavaat.

Kim Kielsenillu pisoq tamakkiisumik pinngitsoq nassuerutigaa.

- Naalakkersuisoqatigiit akornanni oqaluuseraarput tassuuna pitsaanerusinnaagaluarluta, taanna oqarpoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER