Kim Inuilaami: Kalaallit Nunaat iluaqutissannik pissarsivigisimavara

Inuilaamiittunik aallakaatitassiami nuannarineqarluartumi ”Alene i Vildmarken”-imi peqataasut pingasuinnanngorput, Kim Krohnilu, inuunermi ukiuini siullerni 26-ni Nuummi najugaqarsimasoq Nuup Kangerlua ornittagannaaralugu, nammineq isumaqarpoq, kaannerup, qiianerup kiserliornerullu naammagalugit atorsinnaanissaannut piareersarluarsimalluni.

- Ataatama Nuup Kangerluani ukioq kaajallallugu aallaaniaqatigisarnera aalisariaqatigisarneralu ilikkagaqarfigingaatsiarsimavara. Pinngortitap qanoq paasiniarnissaa isumalluutinillu pisariaqartunik qanoq nassaarniarsinnaanissaq meeraaninniilli immersorneqaatigisimavakka, 45-nik ukiulik Kim Krohn Koldingimi angerlarsimaffimminit oqaluttuarpoq.

Piumasaqaat ataaseq

Inuilaamiinnini taamaallaat oqaluttuarisinnaavaa ataatsimik piumasaqarfigineqaarluni. Qanoq inerneqarnera oqaatiginngilluinnassavaa. Kingullersaava?

Peqataasut sinneruttut pingasut immikkoortut arferngata kingorna sapaatip-akunnerini sisamangajanni inuilaamiissimapput. Tamannali Kim Krohnimut takornartaanngilaq.

- Inuusuttuaraallunga akuttunngitsumik Nuup Kangerluaniittarpunga, ilaatigullu qaammat ilivitsoq tassaniissinnaasarlunga. Tamanna imminut paasisimasaqarfiginermik annertuumik pissarsissutigisimavara, eqqarsaatimalu qanoq aqunnnissaannik paasisaqarfigilluarsimallugu. Ilikkagassaq tamanna uannut pingaarutilerujussuusimavoq. Inuilaamiinnermik aallakaatitassiamiinnaanngitsoq, aammali nammineq suliffeqarfiutinni sianissutsimut eqqarsartaatsimullu tunngasuni sungiusaasutut, meeqqanut marlunnut ataataq oqaluttuarpoq.

Piginnaasat pingaarnersaat

- Pissutsit uumaniarnissap pineqarfigisai inissisimaffigitillugit piginnaasat ineriartortinneqarajuttarput, kisianni eqqarsartaatsikkut nukittussuseq piginnaasani pingaarnerpaavoq, Kim Krohn oqarpoq.

- Avatangiiserisani nipiliorneq uivernerlu qimassimatillugit inuttut piginnaasat takorloorsimasanit annerusarput. Akeqqat ajornersaat amerlanertigut tassaasarpoq inuk nammineq, eqqarsaatit aqunneqarsinnaasariaqarmata, nassuiaavoq itisiliillunilu:

- Immikkoortumi kingullerni ernera angajulleq inuuissiortoq inuulluaqqussuteqarfigaara. Tamanna misigissutsikkut annertoorujussuarmik unammillerneqaatigissallugu nalunngereersimavara. Taamaammut Norgemut angalanissaq sioqqullugu "tamanna" sungiusareersimavara. Aap, ilaquttat pillugit eqqarsaatit ammarsinnaanerat tamatumalu kingorna matulluinnarsinnaanissaat pineqarpoq. Taamaanngippat misigissutsinnit eqqarsaatinnillu pisarineqassaatit, tamatumalu pingaartitatit nikisissavai eqqarsartaatsikkullu sanngiillisillutit, Kim Krohn oqaluttuarpoq.

Imminut paasisimasaqarfigineq

- Suliassanut tunngasuni piginnaasaqarluarsinnaagaluarputit, kisianni eqqarsartaatsikkut qanoq nukittutiginerit apeqqutaalluinnarpoq, tamannalu imminut paasisimasaqarfigilluarnissamik piumasaqarfiuvoq, oqarpoq.

Kim Krohn oqaluttuarpoq, Issittumi peroriartorsimanini Nuup Kangerluanilu qaqqani angalaartarsimanerpassuani tunngavigalugit unammillertiminut sanilliulluni asseqanngitsumik misilittagaqalersimalluni.

Kisianni nissumigut ikia, aseruukkiartuinnarsorinartoq, qanoq piva? Kangerliumanermilu Skyggebugtenimi qaqqaq itivillugu qassusersoriartorluni angalasaqattaartarnerpassui, avalequtit allallu nuannerpallaanngitsut qinngarnarsiartorfigisaat qanoq pippat – Kim naammattunik nerisarpa? Nillernerami? Eqqarsartaatsimigut ilaquttaminik mattussilluinnarsinnaanini ingerlatiinnarsinnaavaa?

Akissutit aatsaat unnugu nal. 20.00 DR-imi tv-iikkut pissarsiarissavavut.